KHun ka rang

kyoñ chalī kaise chalī ulTī zamāne kī havā kyā lahū ek nahīñ

ek bhaa.ī ne kisī bhaa.ī kā ghar luuT liyā

qatl mamtā ko kiyā nūr-e-nazar luuT liyā

chhīn lī kāñpte hoñToñ se javānī kī duā kyā lahū ek nahīñ

ādamiyyat ko numā.ish meñ sajā rakkhā hai

dharm ko jaise kitāboñ meñ chhupā rakkhā hai

jaise ehsās-e-mohabbat hai qayāmat kī balā kyā lahū ek nahīñ

azmat-e-amn kā paiġhām chale the le kar

bāda-e-sabr kā bhī jaam chale the le kar

shīsha-e-zabt to nāzuk thā magar TuuT gayā kyā lahū ek nahīñ

saath dīvāne chale ek hī manzil ke liye

ek kashtī thī ravāñ ek hī sāhil ke liye

maqsad-e-zīst magar jā ke kahīñ Duub gayā kyā lahū ek nahīñ

apne hī ḳhuun kī barkhā meñ nahā.e hai samāj

koī pūchhe to dahakte hue sho.aloñ kā mizāj

aag ye kis ne lagā.ī ye makāñ kis kā jalā kyā lahū ek nahīñ

apnī laġhzish pe nadāmat kā sahārā de de

aaj phir amn-o-mohabbat kā kinārā de de

kyā huā kaise huā yaar mire bhuul bhī jā kyā lahhū ek nahīñ

kyon chali kaise chali ulTi zamane ki hawa kya lahu ek nahin

ek bhai ne kisi bhai ka ghar luT liya

qatl mamta ko kiya nur-e-nazar luT liya

chhin li kanpte honTon se jawani ki dua kya lahu ek nahin

aadamiyyat ko numaish mein saja rakkha hai

dharm ko jaise kitabon mein chhupa rakkha hai

jaise ehsas-e-mohabbat hai qayamat ki bala kya lahu ek nahin

azmat-e-amn ka paigham chale the le kar

baada-e-sabr ka bhi jam chale the le kar

shisha-e-zabt to nazuk tha magar TuT gaya kya lahu ek nahin

sath diwane chale ek hi manzil ke liye

ek kashti thi rawan ek hi sahil ke liye

maqsad-e-zist magar ja ke kahin Dub gaya kya lahu ek nahin

apne hi KHun ki barkha mein nahae hai samaj

koi puchhe to dahakte hue shoalon ka mizaj

aag ye kis ne lagai ye makan kis ka jala kya lahu ek nahin

apni laghzish pe nadamat ka sahaara de de

aaj phir amn-o-mohabbat ka kinara de de

kya hua kaise hua yar mere bhul bhi ja kya lahhu ek nahin