KHun ke phul

jahāñ bhī ḳhuun Tapaktā hai sarfaroshoñ kā

buland ho ke vo dhartī gagan se miltī hai

uḌe jahāñ se shahīdoñ kai jism kī ḳhushbū

bahār aa ke gale us chaman se miltī hai

jo saath laa.e salīb-o-kafan kī sauġhāteñ

vo maut nāz-o-adā meñ dulhan se miltī hai

vafā baġhair lahū surḳh-rū nahīñ hotī

ye raah manzil-e-dār-o-rasan se miltī hai

nikhār detī hai ā.īna-e-jabīn-e-vatan

shuā-e-rang jo zaḳhm-e-badan se miltī hai

vo raushnī jo lab-e-zaḳhm se ubhartī hai

ufaq pe nāchtī hañstī kiran se miltī hai

vo surḳhī-e-sar-e-dāman jo ho vatan ke liye

jamāl-e-lāla-o-sarv-o-saman se miltī hai

vo maut jis se mahakte haiñ zindagī ke chaman

baḌe ḳhulūs baḌe bāñkpan se miltī hai

hayāt phuul bikhere tumhārī rāhoñ meñ

ki tum ne iid manā.ī hai razm-gāhoñ meñ

jahan bhi KHun Tapakta hai sarfaroshon ka

buland ho ke wo dharti gagan se milti hai

uDe jahan se shahidon kai jism ki KHushbu

bahaar aa ke gale us chaman se milti hai

jo sath lae salib-o-kafan ki saughaten

wo maut naz-o-ada mein dulhan se milti hai

wafa baghair lahu surKH-ru nahin hoti

ye rah manzil-e-dar-o-rasan se milti hai

nikhaar deti hai aaina-e-jabin-e-watan

shua-e-rang jo zaKHm-e-badan se milti hai

wo raushni jo lab-e-zaKHm se ubharti hai

ufaq pe nachti hansti kiran se milti hai

wo surKHi-e-sar-e-daman jo ho watan ke liye

jamal-e-lala-o-sarw-o-saman se milti hai

wo maut jis se mahakte hain zindagi ke chaman

baDe KHulus baDe bankpan se milti hai

hayat phul bikhere tumhaari rahon mein

ki tum ne id manai hai razm-gahon mein