KHwab-e-hasti

vo zamāne aur the jab terā ġham sahtā thā maiñ

jab tire hoñToñ kī rañgīnī se kuchh kahtā thā maiñ

jab tire bāloñ se ghanToñ kheltā rahtā thā maiñ

bhuul jā ai dost vo rañgīñ zamāne bhuul jā

yak-ba-yak bijlī sī chamkī aur nasheman luT gayā

tū ne barsoñ jis ko sīñchā thā vo gulshan luT gayā

tū ne motī jis meñ Tāñke the vo dāman luT gayā

bhuul jā ai dost vo rañgīñ zamāne bhuul jā

tujh ko jis dil se mohabbat thī vo ab dil hī nahīñ

raqs jis kā tujh ko bhātā thā vo bismil hī nahīñ

rañg-e-mahfil tujh se kyā kahiye vo mahfil hī nahīñ

bhuul jā ai dost vo rañgīñ zamāne bhuul jā

ab na vo shauq-e-tasavvur, ab na vo zauq-e-fuġhāñ

miT rahe haiñ rafta rafta ahd-e-rafta ke nishāñ

dhundlī dhundlī sī nazar aatī haiñ kuchh parchhā.iyāñ

bhuul jā ai dost vo rañgīñ zamāne bhuul jā

ye javānī, ye pareshānī, ye paiham iztirāb

bār-hā uljhan meñ dauḌā huuñ sū-e-jām-e-sharāb

bār-hā ghabrā ke chheḌā hai gunāhoñ kā rabāb

bhuul jā ai dost vo rañgīñ zamāne bhuul jā

rañg-e-sahbā aur hai sahbā kī mastī aur hai

zikr-e-pastī aur hai ehsās-e-pastī aur hai

ḳhvāb-e-hastī aur hai ta.abīr-e-hastī aur hai

bhuul jā ai dost vo rañgīñ zamāne bhuul jā

wo zamane aur the jab tera gham sahta tha main

jab tere honTon ki rangini se kuchh kahta tha main

jab tere baalon se ghanTon khelta rahta tha main

bhul ja ai dost wo rangin zamane bhul ja

yak-ba-yak bijli si chamki aur nasheman luT gaya

tu ne barson jis ko sincha tha wo gulshan luT gaya

tu ne moti jis mein Tanke the wo daman luT gaya

bhul ja ai dost wo rangin zamane bhul ja

tujh ko jis dil se mohabbat thi wo ab dil hi nahin

raqs jis ka tujh ko bhata tha wo bismil hi nahin

rang-e-mahfil tujh se kya kahiye wo mahfil hi nahin

bhul ja ai dost wo rangin zamane bhul ja

ab na wo shauq-e-tasawwur, ab na wo zauq-e-fughan

miT rahe hain rafta rafta ahd-e-rafta ke nishan

dhundli dhundli si nazar aati hain kuchh parchhaiyan

bhul ja ai dost wo rangin zamane bhul ja

ye jawani, ye pareshani, ye paiham iztirab

bar-ha uljhan mein dauDa hun su-e-jam-e-sharab

bar-ha ghabra ke chheDa hai gunahon ka rabab

bhul ja ai dost wo rangin zamane bhul ja

rang-e-sahba aur hai sahba ki masti aur hai

zikr-e-pasti aur hai ehsas-e-pasti aur hai

KHwab-e-hasti aur hai tabir-e-hasti aur hai

bhul ja ai dost wo rangin zamane bhul ja