KHwab-e-sahar

mahr sadiyoñ se chamaktā hī rahā aflāk par

raat hī taarī rahī insān ke idrāk par

aql ke maidān meñ zulmat kā Derā hī rahā

dil meñ tārīkī dimāġhoñ meñ añdherā hī rahā

ik na ik maz.hab kī sa.ī-e-ḳhām bhī hotī rahī

ahl-e-dil par bārish-e-ilhām bhī hotī rahī

āsmānoñ se farishte bhī utarte hī rahe

nek bande bhī ḳhudā kā kaam karte hī rahe

ibn-e-maryam bhī uThe mūsī-e-imrāñ bhī uThe

raam o gautam bhī uThe fir.aun o hāmāñ bhī uThe

ahl-e-saif uThte rahe ahl-e-kitāb aate rahe

iiñ janāb uThte aur āñ-janāb aate rahe

hukmarāñ dil par rahe sadiyoñ talak asnām bhī

abr-e-rahmat ban ke chhāyā dahr par islām bhī

masjidoñ meñ maulvī ḳhutbe sunāte hī rahe

mandiroñ meñ barhaman ashlok gaate hī rahe

aadmī minnat-kash-e-arbāb-e-irfāñ hī rahā

dard-e-insānī magar mahrūm-e-darmāñ hī rahā

ik na ik dar par jabīn-e-shauq ghistī hī rahī

ādamiyyat zulm kī chakkī meñ pastī hī rahī

rahbarī jaarī rahī paiġhambarī jaarī rahī

diin ke parde meñ jañg-e-zargarī jaarī rahī

ahl-e-bātin ilm se sīnoñ ko garmāte rahe

jahl ke tārīk saa.e haath phailāte rahe

ye musalsal āfateñ ye yorish ye qatl-e-ām

aadmī kab tak rahe auhām-e-bātil kā ġhulām

zehan-e-insānī ne ab auhām ke zulmāt meñ

zindagī kī saḳht tūfānī añdherī raat meñ

kuchh nahīñ to kam se kam ḳhvāb-e-sahar dekhā to hai

jis taraf dekhā na thā ab tak udhar dekhā to hai

mahr sadiyon se chamakta hi raha aflak par

raat hi tari rahi insan ke idrak par

aql ke maidan mein zulmat ka Dera hi raha

dil mein tariki dimaghon mein andhera hi raha

ek na ek mazhab ki sai-e-KHam bhi hoti rahi

ahl-e-dil par barish-e-ilham bhi hoti rahi

aasmanon se farishte bhi utarte hi rahe

nek bande bhi KHuda ka kaam karte hi rahe

ibn-e-maryam bhi uThe musi-e-imran bhi uThe

ram o gautam bhi uThe firaun o haman bhi uThe

ahl-e-saif uThte rahe ahl-e-kitab aate rahe

in janab uThte aur aan-janab aate rahe

hukmaran dil par rahe sadiyon talak asnam bhi

abr-e-rahmat ban ke chhaya dahr par islam bhi

masjidon mein maulwi KHutbe sunate hi rahe

mandiron mein barhaman ashlok gate hi rahe

aadmi minnat-kash-e-arbab-e-irfan hi raha

dard-e-insani magar mahrum-e-darman hi raha

ek na ek dar par jabin-e-shauq ghisti hi rahi

aadamiyyat zulm ki chakki mein pasti hi rahi

rahbari jari rahi paighambari jari rahi

din ke parde mein jang-e-zargari jari rahi

ahl-e-baatin ilm se sinon ko garmate rahe

jahl ke tarik sae hath phailate rahe

ye musalsal aafaten ye yorish ye qatl-e-am

aadmi kab tak rahe auham-e-baatil ka ghulam

zehan-e-insani ne ab auham ke zulmat mein

zindagi ki saKHt tufani andheri raat mein

kuchh nahin to kam se kam KHwab-e-sahar dekha to hai

jis taraf dekha na tha ab tak udhar dekha to hai