KHwab

hisār-e-rañj meñ rahte hue tujhe chāhūñ

ġhubār-e-rāh-e-yaqīñ meñ sadā tujhe dekhūñ

jabīn-e-vaqt pe har-ān bas tujhe likkhūñ

charāġh-e-hijr banūñ rāt-bhar tirī āñkhoñ

ke jañgaloñ meñ karūñ raushnī uḌā.ūñ tirī

sunahrī niiñd añdheroñ bhare makānoñ meñ

tire vajūd se apnā vajūd bāñdh ke maiñ

samundaroñ meñ karūñ raqs jal-parī kī tarah

sunā.ūñ shā.irī tujh par likhī ġhazāloñ ko

banā.ūñ lams tirā itr meñ karūñ nīlām

tamām-shahr ke aage use bane jannat

har ik darīcha khule jo qabā tirī hī mahak

uThe jahāñ se bhī guzrūñ faqat tirī ḳhushbū

kare tavāf mirā kū-ba-kū faqat to ho

ai shaḳhs tere jamāl-e-javān kī saugand

dhaḌak rahā hai hamesha mirī ragoñ meñ tū

tirā sarāpā adab kī kitāb jaisā hai

tujhe paḌhūñ tujhe likkhūñ tujhe sunūñ har-vaqt

kisī sahīfe kī tafsīr tarjuma tirā jism

kisī qadīm qalam se likhā huā tirā ism

kisī charāġh se miltā huā tirā chehra

kisī dahaktī huī shaam sī tirī āñkheñ

kisī bikhartī huī dāstān sī zulfeñ

kisī gulāb se ārāsta tape hue gaal

larazte hoñT shikasta-suḳhan Darā lahja

chamakte haath sulagtī huī jabīñ pe jamī

ġhamoñ kī gard mujhe ki rahī hai chuum ke maiñ

niDhāl pair tire aable ginūñ saare

thakān saarī utārūñ tirī dabā.ūñ sar

pilā.ūñ sharbat-e-sandal sañvār ke tire baal

karūñ maiñ pyaar se kañghī likhūñ safar pe tire

maiñ aisī nazm koī jo tujhe rakhe sarsabz

tirī bujhī huī āñkheñ bharūñ maiñ ḳhvāboñ se

tire dukhoñ kā sukhoñ se sadā ilaaj karūñ

sunā.ūñ nazm tumheñ maiñ gale lagā ke na.ī

tumhārī shirt pe meñ āñsuoñ se kaaj karūñ

hisar-e-ranj mein rahte hue tujhe chahun

ghubar-e-rah-e-yaqin mein sada tujhe dekhun

jabin-e-waqt pe har-an bas tujhe likkhun

charagh-e-hijr banun raat-bhar teri aankhon

ke jangalon mein karun raushni uDaun teri

sunahri nind andheron bhare makanon mein

tere wajud se apna wajud bandh ke main

samundaron mein karun raqs jal-pari ki tarah

sunaun shairi tujh par likhi ghazalon ko

banaun lams tera itr mein karun nilam

tamam-shahr ke aage use bane jannat

har ek daricha khule jo qaba teri hi mahak

uThe jahan se bhi guzrun faqat teri KHushbu

kare tawaf mera ku-ba-ku faqat to ho

ai shaKHs tere jamal-e-jawan ki saugand

dhaDak raha hai hamesha meri ragon mein tu

tera sarapa adab ki kitab jaisa hai

tujhe paDhun tujhe likkhun tujhe sunun har-waqt

kisi sahife ki tafsir tarjuma tera jism

kisi qadim qalam se likha hua tera ism

kisi charagh se milta hua tera chehra

kisi dahakti hui sham si teri aankhen

kisi bikharti hui dastan si zulfen

kisi gulab se aarasta tape hue gal

larazte honT shikasta-suKHan Dara lahja

chamakte hath sulagti hui jabin pe jami

ghamon ki gard mujhe ki rahi hai chum ke main

niDhaal pair tere aable ginun sare

thakan sari utarun teri dabaun sar

pilaun sharbat-e-sandal sanwar ke tere baal

karun main pyar se kanghi likhun safar pe tere

main aisi nazm koi jo tujhe rakhe sarsabz

teri bujhi hui aankhen bharun main KHwabon se

tere dukhon ka sukhon se sada ilaj karun

sunaun nazm tumhein main gale laga ke nai

tumhaari shirt pe mein aansuon se kaj karun