KHwab

ḳhvāb fan kā sarmāya ḳhvāb fan kī pūñjī hai

ḳhvāb mujh se mat chhīno

ḳhvāb dekhne do mujhe ḳhvāb bāñTne do mujhe

kufr radd kiyā maiñ ne raushnī ko diiñ jaanā

ahraman ke beToñ ko maiñ ne ahraman jaanā

un ko sar-nigūñ dekhā bārgāh-e-yazdāñ meñ

āftāb dāman meñ māhtāb jeboñ meñ

maiñ ne bhar liye kitne

tīrgī miTāne ko zindagī kī rāhoñ se

maañg maiñ ne dhartī kī rang-o-nūr se bhar dī

kahkashāñ kī chādar se Dhak diyā badan us kā

chār-sū dhanak phūTī chār-sū shafaq phūlī

āftāb dāman meñ

māhtāb jeboñ meñ merī jagmagāne do

ḳhvāb merī pūñjī hai ḳhvāb merā sarmāya

ḳhvāb mujh se mat chhīno

ḳhvāb mujh se mat chhīno

KHwab fan ka sarmaya KHwab fan ki punji hai

KHwab mujh se mat chhino

KHwab dekhne do mujhe KHwab banTne do mujhe

kufr radd kiya main ne raushni ko din jaana

ahraman ke beTon ko main ne ahraman jaana

un ko sar-nigun dekha bargah-e-yazdan mein

aaftab daman mein mahtab jebon mein

main ne bhar liye kitne

tirgi miTane ko zindagi ki rahon se

mang main ne dharti ki rang-o-nur se bhar di

kahkashan ki chadar se Dhak diya badan us ka

chaar-su dhanak phuTi chaar-su shafaq phuli

aaftab daman mein

mahtab jebon mein meri jagmagane do

KHwab meri punji hai KHwab mera sarmaya

KHwab mujh se mat chhino

KHwab mujh se mat chhino