KHwab ki dilli

sapne meñ raat aa.ī dillī

dair talak batyā.ī dillī

pūchh rahī thī haal batāo

guzrā kaise saal batāo

basne vāloñ meñ dillī ke

bolo sachche dost nahīñ the

yā ki buzurgoñ kī sohbat meñ

kamī thī kuchh un kī shafqat meñ

ba-yak nazar har chiiz bhulā dī

manzar ko yā ḳhud ko sazā dī

maiñ jo tere dil kī adā thī

kyā merī ulfat hī ḳhatā thī

galiyāñ saḌkeñ daftar hotel

har jā hai yādoñ kī halchal

aaj meñ kyā ḳhūbī hai jo yuuñ

bhuul chuke ho tum apnā kal

husn ke haiñ vo kaun se jalve

jo mere dāman meñ nahīñ the

kyā aisī uftād paḌī jo

bhuul ga.e dil-sāz zamīñ ko

kyā mere saa.e ke nīche

rāhat aur ārām nahīñ the

maanā parā.ī thī maiñ haa.e

apnoñ se kitne sukh paa.e

savāloñ kī is aaḌ meñ dillī

vaj.h-e-judā.ī pūchh rahī thī

jamī thiiñ mujh par ka.ī nigāheñ

dil meñ dabī thiiñ apnī aa.heñ

kahtā kyā alfāz nahīñ the

āñkhoñ se aañsū bah nikle

saarī hālat jaan ga.ī vo

kah ke mujhe nādān ga.ī vo

sapne meñ raat aa.ī dillī

dair talak batyā.ī dillī

sapne mein raat aai dilli

dair talak batyai dilli

puchh rahi thi haal batao

guzra kaise sal batao

basne walon mein dilli ke

bolo sachche dost nahin the

ya ki buzurgon ki sohbat mein

kami thi kuchh un ki shafqat mein

ba-yak nazar har chiz bhula di

manzar ko ya KHud ko saza di

main jo tere dil ki ada thi

kya meri ulfat hi KHata thi

galiyan saDken daftar hotel

har ja hai yaadon ki halchal

aaj mein kya KHubi hai jo yun

bhul chuke ho tum apna kal

husn ke hain wo kaun se jalwe

jo mere daman mein nahin the

kya aisi uftad paDi jo

bhul gae dil-saz zamin ko

kya mere sae ke niche

rahat aur aaram nahin the

mana parai thi main hae

apnon se kitne sukh pae

sawalon ki is aaD mein dilli

wajh-e-judai puchh rahi thi

jami thin mujh par kai nigahen

dil mein dabi thin apni aahen

kahta kya alfaz nahin the

aankhon se aansu bah nikle

sari haalat jaan gai wo

kah ke mujhe nadan gai wo

sapne mein raat aai dilli

dair talak batyai dilli