KHwab ki shelf par dhari nazm

agar samundar mujhe rāsta detā

to safar kartī us qindīl ke saath

jo shaam kā malgajā phailte hī

sāhil par raushan ho jaatī hai

uḌtī qaqnus ke ham-rikāb

ufuq kī masāfatoñ meñ

tairtī machhliyoñ ke sañg

khojtī reg-zāroñ meñ

nīlgūñ pāniyoñ ko

surma.ī pahāḌoñ meñ

jādūī surangoñ ko

lekin mere sirhāne

aadhe paune ḳhvāb paḌe haiñ

aur merī shelf par dhare haiñ

kāñch ke nāzuk bartan

sabzī ke chhilke

ghar kī dīvāroñ par

mere beTe kī khiñchī lakīroñ meñ

an-sunī kahāniyāñ haiñ

jo muskurātī khilkhilātī haiñ

aur bāteñ kartī haiñ āñkhoñ hī āñkhoñ meñ

vo kahāniyāñ suntī maiñ daf.atan chauñk jaatī huuñ

adhūre ḳhvāb bhī mere

kitne sharminda-e-ta.abīr hue

magar phir bhī Dartī huuñ

ki merī beTī

aadhe ḳhvāb dekh kar

unheñ adhūrā chhoḌ na de

buuñd buuñd duā utartī hai

dil kī zamīñ pe

pahlī bārish kī mānind

aur siilī miTTī se shāḳh-dar-shāḳh

tamannā.eñ phuuT paḌtī haiñ

agar samundar mujhe rasta deta

to safar karti us qindil ke sath

jo sham ka malgaja phailte hi

sahil par raushan ho jati hai

uDti qaqnus ke ham-rikab

ufuq ki masafaton mein

tairti machhliyon ke sang

khojti reg-zaron mein

nilgun paniyon ko

surmai pahaDon mein

jadui surangon ko

lekin mere sirhane

aadhe paune KHwab paDe hain

aur meri shelf par dhare hain

kanch ke nazuk bartan

sabzi ke chhilke

ghar ki diwaron par

mere beTe ki khinchi lakiron mein

an-suni kahaniyan hain

jo muskuraati khilkhilati hain

aur baaten karti hain aankhon hi aankhon mein

wo kahaniyan sunti main dafatan chaunk jati hun

adhure KHwab bhi mere

kitne sharminda-e-tabir hue

magar phir bhi Darti hun

ki meri beTi

aadhe KHwab dekh kar

unhen adhura chhoD na de

bund bund dua utarti hai

dil ki zamin pe

pahli barish ki manind

aur sili miTTi se shaKH-dar-shaKH

tamannaen phuT paDti hain