KHwab

maiñ ne ḳhvāb dekhā thā

pāniyoñ ke paar ik din

bastī ik basā.ūñgā

jis ke rahne vāloñ meñ

nafrateñ nahīñ hoñgī

sirf qurbateñ hoñgī

bas mohabbateñ hoñgī

yuuñ huā ki phir ik din

ik uḌan-khaTole ne

lā khaḌā kiyā mujh ko

merī ḳhvāb bastī meñ

nā-shanās bastī ke

ḳhush-numā makānoñ meñ

qurbateñ to kam kam thiiñ

dūriyāñ ziyāda thiiñ

is se peshtar saare

fard fard ghaT jaa.eñ

un na.e makānoñ ke

fāsle simaT jaa.eñ

kaash sab makīñ apne

sāḳhta hisāroñ se

ek din nikal aa.eñ

aur mere ḳhvāboñ kī

de deñ mujh ko tā'bīreñ

kaash ḳhvāb bastī ik

be-makān bastī ho

kaash sab makāñ apne

ghar meñ phir badal jaa.eñ

ek aisā ghar ki jo

pāniyoñ ke paar ik din

dosh par ho ki maiñ

pīchhe chhoḌ aayā thā

kaash kaash kī gardān

ḳhvāb ḳhvāb yuuñ gūñjī

aañkh khul ga.ī sāhab

aañkh jab kholī maiñ ne

kuchh na.ī dīvāroñ ke

ḳhud ko darmiyāñ paayā

maiñ na.e jahāñ meñ thā

ik na.e makāñ meñ thā

ḳhvāb maiñ ne dekhā thā

main ne KHwab dekha tha

paniyon ke par ek din

basti ek basaunga

jis ke rahne walon mein

nafraten nahin hongi

sirf qurbaten hongi

bas mohabbaten hongi

yun hua ki phir ek din

ek uDan-khaTole ne

la khaDa kiya mujh ko

meri KHwab basti mein

na-shanas basti ke

KHush-numa makanon mein

qurbaten to kam kam thin

duriyan ziyaada thin

is se peshtar sare

fard fard ghaT jaen

un nae makanon ke

fasle simaT jaen

kash sab makin apne

saKHta hisaron se

ek din nikal aaen

aur mere KHwabon ki

de den mujh ko ta'biren

kash KHwab basti ek

be-makan basti ho

kash sab makan apne

ghar mein phir badal jaen

ek aisa ghar ki jo

paniyon ke par ek din

dosh par ho ki main

pichhe chhoD aaya tha

kash kash ki gardan

KHwab KHwab yun gunji

aankh khul gai sahab

aankh jab kholi main ne

kuchh nai diwaron ke

KHud ko darmiyan paya

main nae jahan mein tha

ek nae makan mein tha

KHwab main ne dekha tha