KHwab mazdur hai

ḳhvāb mazdūr hai

raat din sar pe bhārī taġhārī liye

saañs kī

baañs kī

hāñptī-kāñptī sīḌhiyoñ par

utartā hai

chaḌhtā hai

rū-posh me.amār ke hukm par

ek lā-shakl naqshe pe uThtī huī

uupar uThtī huī

gol dīvār ke

ḳhisht-dar-ḳhisht chakkar meñ mahsūr hai

ḳhvāb mazdūr hai!

ik mashaqqat-zada aadmī kī tarah

maiñ haqīqat kī duniyā meñ

yā ḳhvāb meñ

roz ma.amūl ke kaam kartā huuñ

kuchh der ārām kartā huuñ

kāñToñ bharī khaaT meñ

pyaas ke jaam piitā huuñ

aur sozan-e-hijr se

apnī udhḌī huī tan kī poshāk siitā huuñ

jiitā huuñ

kaisī anokhī haqīqat hai

kaisā ajab ḳhvāb hai

ik mashaqqat-zada aadmī kī tarah

apne hisse kī bajrī uThāne pe māmūr hai

ḳhvāb mazdūr hai!!

KHwab mazdur hai

raat din sar pe bhaari taghaari liye

sans ki

bans ki

hanpti-kanpti siDhiyon par

utarta hai

chaDhta hai

ru-posh meamar ke hukm par

ek la-shakl naqshe pe uThti hui

upar uThti hui

gol diwar ke

KHisht-dar-KHisht chakkar mein mahsur hai

KHwab mazdur hai!

ek mashaqqat-zada aadmi ki tarah

main haqiqat ki duniya mein

ya KHwab mein

roz mamul ke kaam karta hun

kuchh der aaram karta hun

kanTon bhari khaT mein

pyas ke jam pita hun

aur sozan-e-hijr se

apni udhDi hui tan ki poshak sita hun

jita hun

kaisi anokhi haqiqat hai

kaisa ajab KHwab hai

ek mashaqqat-zada aadmi ki tarah

apne hisse ki bajri uThane pe mamur hai

KHwab mazdur hai!!