KHwahish

bahut dinoñ se phuul kī ye ḳhvāhish thī ki uḌ paa.e

lutf rahegā jab vo apnī ḳhushī se aa.e jaa.e

isī phuul ne āḳhir ik din diyā shāḳh ko dhokā

tiilī ban hī gayā vo jab phir us ko kis ne rokā

har din baiTh ke sochā kartā dīpak kā ujyālā

maiñ parvāz jo kartā to ḳhushiyāñ ho jātīñ do-bālā

isī soch meñ āḳhir ik din pañkh us ne bhī paa.e

jugnū ban kar añdhiyāroñ meñ apnī chhab dikhlā.e

tālāboñ kā paanī soche gum-sum din kaTte haiñ

bahut maze meñ lekin panchhī gagan gagan uḌte haiñ

phir us paanī ne bhī ik din bhaap ke pañkh pasāre

lekin gahre bādal ke mele meñ jā kar baare

maiñ ye sochūñ ghoḌā ban ke maidāñ kar luuñ paar

kabhī ye sochūñ machhlī ban kar kāTūñ jal kī dhaar

kabhī ye sochūñ panchhī ban kar chhū luuñ niil gagan

kyā vo puurā hogā sochūñ jo bhī man hī man

bahut dinon se phul ki ye KHwahish thi ki uD pae

lutf rahega jab wo apni KHushi se aae jae

isi phul ne aaKHir ek din diya shaKH ko dhoka

tili ban hi gaya wo jab phir us ko kis ne roka

har din baiTh ke socha karta dipak ka ujyala

main parwaz jo karta to KHushiyan ho jatin do-baala

isi soch mein aaKHir ek din pankh us ne bhi pae

jugnu ban kar andhiyaron mein apni chhab dikhlae

talabon ka pani soche gum-sum din kaTte hain

bahut maze mein lekin panchhi gagan gagan uDte hain

phir us pani ne bhi ek din bhap ke pankh pasare

lekin gahre baadal ke mele mein ja kar bare

main ye sochun ghoDa ban ke maidan kar lun par

kabhi ye sochun machhli ban kar kaTun jal ki dhaar

kabhi ye sochun panchhi ban kar chhu lun nil gagan

kya wo pura hoga sochun jo bhi man hi man