taj-mahal

sañg-e-marmar kī ḳhunuk bāñhoñ meñ

husn-e-ḳhvābīda ke aage mirī āñkheñ shal haiñ

guñg sadiyoñ ke tanāzur meñ koī boltā hai

vaqt jazbe ke tarāzū pe zar-o-sīm-o-javāhir kī taḌap taultā hai!

har na.e chāñd pe patthar vahī sach kahte haiñ

usī lamhe se damak uThte meñ un ke chehre

jis kī lau umr ga.e ik dil-e-shab-zād ko mahtāb banā aa.ī thii!

usī mahtāb kī ik narm kiran

sāñcha-e-sañg meñ Dhal paa.ī to

ishq rañg-e-abadiyyat se sar-afrāz huā

kyā ajab niiñd hai

jis ko chhū kar

jo bhī aatā hai khulī aañkh liye aatā hai

so chuke ḳhvāb-e-abad dekhne vaale kab ke

aur zamāna hai ki us ḳhvāb kī ta.abīr liye jaag rahā hai ab tak!

sang-e-marmar ki KHunuk banhon mein

husn-e-KHwabida ke aage meri aankhen shal hain

gung sadiyon ke tanazur mein koi bolta hai

waqt jazbe ke taraazu pe zar-o-sim-o-jawahir ki taDap taulta hai!

har nae chand pe patthar wahi sach kahte hain

usi lamhe se damak uThte mein un ke chehre

jis ki lau umr gae ek dil-e-shab-zad ko mahtab bana aai thi!

usi mahtab ki ek narm kiran

sancha-e-sang mein Dhal pai to

ishq rang-e-abadiyyat se sar-afraaz hua

kya ajab nind hai

jis ko chhu kar

jo bhi aata hai khuli aankh liye aata hai

so chuke KHwab-e-abad dekhne wale kab ke

aur zamana hai ki us KHwab ki tabir liye jag raha hai ab tak!