kitab ka kiDa

diq tujh se kitābeñ haiñ bahut karam kitābī

tū dushman-e-duzdīda hai ḳhākī ho ki aabī

alfāz kī khetī hai faqat terī charā-gāh

ma.anī kī zamīñ tere sab sāyoñ ne daabī

hone ko tirī asl hai sayyād makīñ-gāh

kahne ko faqat terī haqīqat hai sarābī

tū ne to har ik samt lagā.ī haiñ surañgeñ

pārīna ho farmān kitābeñ huuñ nisābī

bādāmī ho kāġhaz to mazā aur hī kuchh hai

luqma huā tahrīr kā har maġhz shitābī

ghun saath hī gehūñ ke hai pista huā dekhā

bargashta varaq lā na sakā tujh pe ḳharābī

kyā ḳhuub hai ye majlis-e-aurāq-e-kuhan bhī

vīrān kutub-ḳhānoñ kī dīmak tirī loby

firdausī-o-ḳhuldūñ kī kitābeñ haiñ hirāsāñ

vo qil.a-e-ma.anī terā hamla hai javābī

parda hai ḳhamoshī tirī āhañg-e-fanā kī

bhauñrā hai faqat kunj-e-gulistāñ kā rabābī

tū chaaT gayā dānish-e-kohna kī fasīleñ

buniyād-e-imārat ko hai Dhānā tirī hobby

a.adād ke qālib meñ hai to sifr kī tāqat

safhāt ke sūrāḳh kā be-nām hisābī

tārīḳh ke is cell meñ insān ne paa.ī

ek aadh koī mauj-e-nafs vo bhī habābī

bikte sar-e-bāzār haiñ mānind-e-zaġhāl aaj

jo tāza-nafas ḳhvāb-e-taġhayyur the shahābī

khā jaatī hai ik din use sab gard-e-zamāna

miTTī kī vo sahnak ho ki chīnī kī rakābī

badlī huī duniyā meñ taġhayyur kā amal hai

tū kirm-e-kitābī nahīñ ik kirm-e-ḳhalal hai

diq tujh se kitaben hain bahut karam kitabi

tu dushman-e-duzdida hai KHaki ho ki aabi

alfaz ki kheti hai faqat teri chara-gah

mani ki zamin tere sab sayon ne dabi

hone ko teri asl hai sayyaad makin-gah

kahne ko faqat teri haqiqat hai sarabi

tu ne to har ek samt lagai hain surangen

parina ho farman kitaben hun nisabi

baadami ho kaghaz to maza aur hi kuchh hai

luqma hua tahrir ka har maghz shitabi

ghun sath hi gehun ke hai pista hua dekha

bargashta waraq la na saka tujh pe KHarabi

kya KHub hai ye majlis-e-auraq-e-kuhan bhi

viran kutub-KHanon ki dimak teri loby

firdausi-o-KHuldun ki kitaben hain hirasan

wo qila-e-mani tera hamla hai jawabi

parda hai KHamoshi teri aahang-e-fana ki

bhaunra hai faqat kunj-e-gulistan ka rababi

tu chaT gaya danish-e-kohna ki fasilen

buniyaad-e-imarat ko hai Dhana teri hobby

aadad ke qalib mein hai to sifr ki taqat

safhat ke suraKH ka be-nam hisabi

tariKH ke is cell mein insan ne pai

ek aadh koi mauj-e-nafs wo bhi hababi

bikte sar-e-bazar hain manind-e-zaghaal aaj

jo taza-nafas KHwab-e-taghayyur the shahabi

kha jati hai ek din use sab gard-e-zamana

miTTi ki wo sahnak ho ki chini ki rakabi

badli hui duniya mein taghayyur ka amal hai

tu kirm-e-kitabi nahin ek kirm-e-KHalal hai