kitab gumrah kar rahi hai

kitāb gumrāh kar rahī hai

pa ik yaqīñ hai ki

itnī gumrāhiyoñ ke pīchhe

koī to ik raah hogī

jo manziloñ se nahīñ milegī

safar pe jo gāmzan rakhegī

ye shirk-e-kohna

safar kī vahdāniyat ko majrūh kar rahā hai

kahāñ kī manzil

kahāñ hai manzil

ye shirk ke haiñ sarāb saare

ham aap haiñ mahv-e-ḳhvāb saare

ye shirk afyūn ban ke ḳhuuñ meñ ghulā huā hai

hujūm-e-manzil meñ ab safar kī shanāḳht

ḳhud ek mas.ala hai

safar ḳhalā hai

ḳhalā meñ jo kuchh bhī ho natīja vahī ḳhalā hai

yahī ḳhalā hai!

ḳhalā ko manzil ke naqsh-e-pā se kasīf karne kā

ahmaqāna ḳhayāl chhoḌo

kitāb gumrāh kar rahī hai!

safar pe niklo

pa manziloñ ke muhīb sāyoñ kī zad se

ḳhud ko bachā.e rakkho

safar pe paañv jamā.e rakkho

ye sab vajūd o adam ke qisse

safar meñ taḳhlīq ho rahe haiñ

azal nahīñ hai abad nahīñ hai

ye ik safar hai ki had nahīñ hai

to kaise nā-had meñ

manziloñ kī hadeñ banā.eñ

ḳhalā ḳhalā ḳhalā.eñ

isī vajūd-e-ḳhalā meñ insāñ

vajūd-e-insān shirk-e-a.azam

ye ek nukta hai ism-e-āzam

kis ism-e-āzam kī justujū meñ

kitāb tasnīf ho rahī hai

kitāb tālīf ho rahī hai

vajūd-e-insāñ

kitāb tasnīf kar rahā hai

kitāb tālīf kar rahā hai

kitāb gumrāh kar rahī hai

kitab gumrah kar rahi hai

pa ek yaqin hai ki

itni gumrahiyon ke pichhe

koi to ek rah hogi

jo manzilon se nahin milegi

safar pe jo gamzan rakhegi

ye shirk-e-kohna

safar ki wahdaniyat ko majruh kar raha hai

kahan ki manzil

kahan hai manzil

ye shirk ke hain sarab sare

hum aap hain mahw-e-KHwab sare

ye shirk afyun ban ke KHun mein ghula hua hai

hujum-e-manzil mein ab safar ki shanaKHt

KHud ek masala hai

safar KHala hai

KHala mein jo kuchh bhi ho natija wahi KHala hai

yahi KHala hai!

KHala ko manzil ke naqsh-e-pa se kasif karne ka

ahmaqana KHayal chhoDo

kitab gumrah kar rahi hai!

safar pe niklo

pa manzilon ke muhib sayon ki zad se

KHud ko bachae rakkho

safar pe panw jamae rakkho

ye sab wajud o adam ke qisse

safar mein taKHliq ho rahe hain

azal nahin hai abad nahin hai

ye ek safar hai ki had nahin hai

to kaise na-had mein

manzilon ki haden banaen

KHala KHala KHalaen

isi wajud-e-KHala mein insan

wajud-e-insan shirk-e-azam

ye ek nukta hai ism-e-azam

kis ism-e-azam ki justuju mein

kitab tasnif ho rahi hai

kitab talif ho rahi hai

wajud-e-insan

kitab tasnif kar raha hai

kitab talif kar raha hai

kitab gumrah kar rahi hai