koi aashiq kisi mahbuba se!

gulshan-e-yād meñ gar aaj dam-e-bād-e-sabā

phir se chāhe ki gul-afshāñ ho to ho jaane do

umr-e-rafta ke kisī taaq pe bisrā huā dard

phir se chāhe ki farozāñ ho to ho jaane do

jaise begāne se ab milte ho vaise hī sahī

aao do chaar ghaḌī mere muqābil baiTho

garche mil-baiTheñge ham tum to mulāqāt ke baa'd

apnā ehsās-e-ziyāñ aur ziyāda hogā

ham-suḳhan hoñge jo ham donoñ to har baat ke biich

an-kahī baat kā mauhūm sā parda hogā

koī iqrār na maiñ yaad dilā.ūñgā na tum

koī mazmūn vafā kā na jafā kā hogā

gard-e-ayyām kī tahrīr ko dhone ke liye

tum se goyā hoñ dam-e-dīd jo merī palkeñ

tum jo chāho to suno aur jo na chāho na suno

aur jo harf kareñ mujh se gurezāñ āñkheñ

tum jo chāho to kaho aur jo na chāho na kaho

gulshan-e-yaad mein gar aaj dam-e-baad-e-saba

phir se chahe ki gul-afshan ho to ho jaane do

umr-e-rafta ke kisi taq pe bisra hua dard

phir se chahe ki farozan ho to ho jaane do

jaise begane se ab milte ho waise hi sahi

aao do chaar ghaDi mere muqabil baiTho

garche mil-baiThenge hum tum to mulaqat ke ba'd

apna ehsas-e-ziyan aur ziyaada hoga

ham-suKHan honge jo hum donon to har baat ke bich

an-kahi baat ka mauhum sa parda hoga

koi iqrar na main yaad dilaunga na tum

koi mazmun wafa ka na jafa ka hoga

gard-e-ayyam ki tahrir ko dhone ke liye

tum se goya hon dam-e-did jo meri palken

tum jo chaho to suno aur jo na chaho na suno

aur jo harf karen mujh se gurezan aankhen

tum jo chaho to kaho aur jo na chaho na kaho