koyal

ai chait meñ aane vaalī koyal

mutlaq khultā nahīñ tirā raaz

taa.ir tujh ko kahe mirā dil

yā jism se ḳhālī koī āvāz

kis ke ġham meñ hai terī kū kū

batlā hai kaun terā dilbar

phirtī jo Daal Daal hai tū

kis ko tū DhūñDhtī hai āḳhir

jangal jangal ye terī parvāz

āḳhir kis kī talāsh meñ hai

tujh ko hai soz se magar saaz

kaisī pur-dard hai tirī lai

ḳhilqat soī paḌī hai aur jab

saare taa.ir haiñ āshiyāñ meñ

terī par us ghaḌī se har shab

kaTtī hai bhor tak fuġhāñ meñ

lekin nahīñ dard-mañd ik tū

hai terā sharīk ek nāshād

terī hai nisf shab se kū kū

us kī shab bhar hai āh-o-fariyād

din bhar tujh ko hai āfiyat par

us ko dam bhar nahīñ hai rāhat

din bhar rahtā hai saḳht muztar

shab bhar us par hai ik qayāmat

phirtī hai tū mulk mulk is par

tujh ko itnā ġham-o-alam hai

jā hī na sake jo ghar se bāhar

us par kaisā batā sitam hai

lekin ye jaan kar ki tū bhī

kartī hai kisī ke ġham meñ fariyād

is dard bharī sadā ko terī

suntā hai paḌā 'azīm' nāshād

ai chait mein aane wali koyal

mutlaq khulta nahin tera raaz

tair tujh ko kahe mera dil

ya jism se KHali koi aawaz

kis ke gham mein hai teri ku ku

batla hai kaun tera dilbar

phirti jo Dal Dal hai tu

kis ko tu DhunDhti hai aaKHir

jangal jangal ye teri parwaz

aaKHir kis ki talash mein hai

tujh ko hai soz se magar saz

kaisi pur-dard hai teri lai

KHilqat soi paDi hai aur jab

sare tair hain aashiyan mein

teri par us ghaDi se har shab

kaTti hai bhor tak fughan mein

lekin nahin dard-mand ek tu

hai tera sharik ek nashad

teri hai nisf shab se ku ku

us ki shab bhar hai aah-o-fariyaad

din bhar tujh ko hai aafiyat par

us ko dam bhar nahin hai rahat

din bhar rahta hai saKHt muztar

shab bhar us par hai ek qayamat

phirti hai tu mulk mulk is par

tujh ko itna gham-o-alam hai

ja hi na sake jo ghar se bahar

us par kaisa bata sitam hai

lekin ye jaan kar ki tu bhi

karti hai kisi ke gham mein fariyaad

is dard bhari sada ko teri

sunta hai paDa 'azim' nashad