krishn kanhayya

ai dekhne vaalo

is husn ko dekho

is raaz ko samjho

ye naqsh-e-ḳhayālī

ye fikrat-e-ālī

ye paikar-e-tanvīr

ye krishn kī tasvīr

ma.anī hai ki sūrat

san.at hai ki fitrat

zāhir hai ki mastūr

nazdīk hai yā duur

ye naar hai yā nuur

duniyā se nirālā

ye bāñsurī vaalā

gokul kā gvālā

hai sehr ki e.ajāz

khultā hī nahīñ raaz

kyā shaan hai vallāh

kyā aan hai vallāh

hairān huuñ kyā hai

ik shān-e-ḳhudā hai

but-ḳhāne ke andar

ḳhud husn kā but-gar

but ban gayā aa kar

vo turfa nazzāre

yaad aa ga.e saare

jamunā ke kināre

sabze kā lahaknā

phūloñ kā mahaknā

ghanghor ghaTā.eñ

sarmast havā.eñ

ma.asūm umañgeñ

ulfat kī tarañgeñ

vo gopiyoñ ke saath

hāthoñ meñ diye haath

raqsāñ huā brijnāth

bansī meñ jo lai hai

nashsha hai na mai hai

kuchh aur hī shai hai

ik ruuh hai raqsāñ

ik kaif hai larzāñ

ek aql hai mai-nosh

ik hosh hai mad.hosh

ik ḳhanda hai sayyāl

ik girya hai ḳhush-hāl

ik ishq hai maġhrūr

ik husn hai majbūr

ik sehr hai mas.hūr

darbār meñ tanhā

lāchār hai kirishnā

aa shyām idhar aa

sab ahl-e-ḳhusūmat

haiñ dar pa.e izzat

ye raaj dulāre

buzdil hue saare

parda na ho tārāj

bekas kī rahe laaj

aa jā mere kaale

bhārat ke ujāle

dāman meñ chhupā le

vo ho ga.ī an-ban

vo garm huā ran

ġhālib hai duryodhan

vo aa ga.e jagdīsh

vo miT ga.ī tashvīsh

arjun ko bulāyā

updesh sunāyā

ġham-zād kā ġham kyā

ustād kā ġham kyā

lo ho ga.ī tadbīr

lo ban ga.ī taqdīr

lo chal ga.ī shamshīr

sīrat hai adū-soz

sūrat nazar-afroz

dil kaifiyat-andoz

ġhusse meñ jo aa jaa.e

bijlī hī girā jaa.e

aur lutf par aa.e

to ghar bhī luTā jaa.e

pariyoñ meñ hai gulfām

rādhā ke liye shyām

balrām kā bhayyā

mathurā kā basayyā

bindrā meñ kanhayyā

ban ho ga.e vīrāñ

barbād gulistāñ

sakhiyāñ haiñ pareshāñ

jamunā kā kinārā

sunsān hai saarā

tūfān haiñ ḳhāmosh

maujoñ meñ nahīñ josh

lau tujh se lagī hai

hasrat hī yahī hai

ai hind ke raajā

ik baar phir aa jā

dukh dard miTā jā

abr aur havā se

bulbul kī sadā se

phūloñ kī ziyā se

jādū-asarī gum

shorīda-sarī gum

haañ terī judā.ī

mathurā ko na bhaa.ī

tū aa.e to shaan aa.e

tū aa.e to jaan aa.e

aanā na akele

hoñ saath vo mele

sakhiyoñ ke jhamele

ai dekhne walo

is husn ko dekho

is raaz ko samjho

ye naqsh-e-KHayali

ye fikrat-e-ali

ye paikar-e-tanwir

ye krishn ki taswir

mani hai ki surat

sanat hai ki fitrat

zahir hai ki mastur

nazdik hai ya dur

ye nar hai ya nur

duniya se nirala

ye bansuri wala

gokul ka gwala

hai sehr ki eajaz

khulta hi nahin raaz

kya shan hai wallah

kya aan hai wallah

hairan hun kya hai

ek shan-e-KHuda hai

but-KHane ke andar

KHud husn ka but-gar

but ban gaya aa kar

wo turfa nazzare

yaad aa gae sare

jamuna ke kinare

sabze ka lahakna

phulon ka mahakna

ghanghor ghaTaen

sarmast hawaen

masum umangen

ulfat ki tarangen

wo gopiyon ke sath

hathon mein diye hath

raqsan hua brijnath

bansi mein jo lai hai

nashsha hai na mai hai

kuchh aur hi shai hai

ek ruh hai raqsan

ek kaif hai larzan

ek aql hai mai-nosh

ek hosh hai madhosh

ek KHanda hai sayyal

ek girya hai KHush-haal

ek ishq hai maghrur

ek husn hai majbur

ek sehr hai mashur

darbar mein tanha

lachaar hai kirishna

aa shyam idhar aa

sab ahl-e-KHusumat

hain dar pae izzat

ye raj dulare

buzdil hue sare

parda na ho taraj

bekas ki rahe laj

aa ja mere kale

bhaarat ke ujale

daman mein chhupa le

wo ho gai an-ban

wo garm hua ran

ghaalib hai duryodhan

wo aa gae jagdish

wo miT gai tashwish

arjun ko bulaya

updesh sunaya

gham-zad ka gham kya

ustad ka gham kya

lo ho gai tadbir

lo ban gai taqdir

lo chal gai shamshir

sirat hai adu-soz

surat nazar-afroz

dil kaifiyat-andoz

ghusse mein jo aa jae

bijli hi gira jae

aur lutf par aae

to ghar bhi luTa jae

pariyon mein hai gulfam

radha ke liye shyam

balram ka bhayya

mathura ka basayya

bindra mein kanhayya

ban ho gae viran

barbaad gulistan

sakhiyan hain pareshan

jamuna ka kinara

sunsan hai sara

tufan hain KHamosh

maujon mein nahin josh

lau tujh se lagi hai

hasrat hi yahi hai

ai hind ke raja

ek bar phir aa ja

dukh dard miTa ja

abr aur hawa se

bulbul ki sada se

phulon ki ziya se

jadu-asari gum

shorida-sari gum

han teri judai

mathura ko na bhai

tu aae to shan aae

tu aae to jaan aae

aana na akele

hon sath wo mele

sakhiyon ke jhamele