kya chahta hun

na takmīl-e-ahd-e-vafā chāhtā huuñ

na tajdīd-e-jaur-o-jafā chāhtā huuñ

maiñ ik qalb-e-be-mudda.ā chāhtā huuñ

tire ishq kī intihā chāhtā huuñ

mirī sādgī dekh kyā chāhtā huuñ

nahīñ hogā koī bashar shoḳh itnā

koī be-adab is qadar shoḳh itnā

na muusā hue tuur par shoḳh itnā

zarā sā to dil huuñ magar shoḳh itnā

vahī lan-tarānī sunā chāhtā huuñ

jale dil kā armān huuñ ahl-e-mahfil

magar bazm kī jaan huuñ ahl-e-mahfil

usī par maiñ qurbān huuñ ahl-e-mahfil

koī dam kā mehmān huuñ ahl-e-mahfil

charāġh-e-sahar huuñ bujhā chāhtā huuñ

karam ho ki ho dāvat-e-bāryābī

ki ho ḳhāna-e-dil kī mere ḳharābī

hazīmat ho yā muzhda-e-kāmyābī

sitam ho ki ho va.ada-e-be-hijābī

koī baat sab se judā chāhtā huuñ

mashaqqat mubārak rahe zāhidoñ ko

ye zahmat mubārak rahe zāhidoñ ko

ye ishrat mubārak rahe zāhidoñ ko

ye jannat mubārak rahe zāhidoñ ko

ki un kā maiñ bas sāmnā chāhtā huuñ

na takmil-e-ahd-e-wafa chahta hun

na tajdid-e-jaur-o-jafa chahta hun

main ek qalb-e-be-muddaa chahta hun

tere ishq ki intiha chahta hun

meri sadgi dekh kya chahta hun

nahin hoga koi bashar shoKH itna

koi be-adab is qadar shoKH itna

na musa hue tur par shoKH itna

zara sa to dil hun magar shoKH itna

wahi lan-tarani suna chahta hun

jale dil ka arman hun ahl-e-mahfil

magar bazm ki jaan hun ahl-e-mahfil

usi par main qurban hun ahl-e-mahfil

koi dam ka mehman hun ahl-e-mahfil

charagh-e-sahar hun bujha chahta hun

karam ho ki ho dawat-e-baryabi

ki ho KHana-e-dil ki mere KHarabi

hazimat ho ya muzhda-e-kaamyabi

sitam ho ki ho wada-e-be-hijabi

koi baat sab se juda chahta hun

mashaqqat mubarak rahe zahidon ko

ye zahmat mubarak rahe zahidon ko

ye ishrat mubarak rahe zahidon ko

ye jannat mubarak rahe zahidon ko

ki un ka main bas samna chahta hun