kya gul-badani hai

kis darja fusūñ-kār vo allāh ġhanī hai

kyā mauja-e-tābindagī o sīm-tanī hai

andāz hai yā jazba-e-gardūñ-zadanī hai

āvāz hai yā barbat-e-īmāñ-shiknī hai

jañgal kī siyah raat hai yā zulf ghanī hai

kyā gul-badanī gul-badanī gul-badanī hai

ye lai hai ki khiltī huī ġhunche kī kamānī

mahkā huā ye tan hai ki ye raat kī raanī

lahje kī ye rau hai ki barastā huā paanī

larzish meñ ye mizhgāñ hai ki pariyoñ kī kahānī

ye surḳhi-e-lab hai ki aqīq-e-yamanī hai

kyā gul-badanī gul-badanī gul-badanī hai

mehrāb hai ruḳhsār ke partav se zar-afshāñ

zulfoñ meñ shab-e-tār hai āñkhoñ meñ charāġhāñ

mehñdī kī sajāvaT ki hathelī pe gulistāñ

yā halqa-e-ushshāq meñ hai chehra-e-tābāñ

yā ḳhātam-e-tābinda pe hiire kī kanī hai

kyā gul-badanī gul-badanī gul-badanī hai

siine pe ye pallū hai ki ik mauj-e-hayābī

māthā hai ki ik sub.h kā partav hai shahābī

āñkheñ haiñ ki bahke hue do mast sharābī

paikar hai ki insān ke sāñche meñ gulābī

gesū haiñ ki gul-bāzī-e-mushk-e-ḳhutanī hai

kyā gul-badanī gul-badanī gul-badanī hai

kākul meñ daraḳhshāñ hai ye peshānī-e-raqsāñ

yā sāya-e-zulmāt meñ hai chashma-e-haivāñ

hāthoñ pe hai ye chehra ki hai rehl pe qur.āñ

aur chehra-e-gul-rañg meñ ġhaltāñ o ḳharoshāñ

raḳhshandagī-e-ḳhūn-e-rag-e-yāsimanī hai

kyā gul-badanī gul-badanī gul-badanī hai

ishve haiñ ki ik fauj khaḌī luuT rahī hai

chhal-bal hai ki chhātī ko zamīñ kuuT rahī hai

añgḌā.ī kā ḳham hai ki dhanak TuuT rahī hai

mukhḌā hai ki parbat pe kiran phuuT rahī hai

qāmat hai ki barnā.ī-e-sarv-e-chamanī hai

kyā gul-badanī gul-badanī gul-badanī hai

tan meñ hai vo ḳhushbū ki haiñ gul sar-ba-garebāñ

chehre pe vo surḳhī hai ki hairān gulistāñ

vo chaal meñ hai loch ki shāḳheñ haiñ pashemāñ

aur la.al-e-guhar-bār pe vo naġhma hai ġhaltāñ

vo naġhma ki ik valvala-e-sho.ala-zanī hai

kyā gul-badanī gul-badanī gul-badanī hai

gardan meñ chañdan-hār hai hāthoñ meñ hai kañgan

umDe hue ishve haiñ garajtā huā jauban

jaulāñ hai javānī ke dhundalke meñ laḌakpan

korā hai jo pinDā to junūñ-ḳhez hai ubTab

gul-rañg shalūkā hai qabā nārdanī hai

kyā gul-badanī gul-badanī gul-badanī hai

ḳhalvat meñ vo taslīm hai jalvat meñ tahakkum

sāhil pe subuk-mauj safīne meñ talātum

hujre meñ ḳhamoshī hai shabistāñ meñ takallum

ḳheme meñ tunuk aah ḳhayāloñ meñ tarannum

āġhosh meñ talvār hai ghūñghaT meñ banī hai

kyā gul-badanī gul-badanī gul-badanī hai

har naqsh-e-qadam par hai fidā tāj-e-kayānī

har gaam meñ hai chashma-e-kausar kī ravānī

har ek bun-e-mū se ubaltī hai javānī

uThtī hai masāmāt se yuuñ bhaap sī dhānī

goyā koī mahkī huī chādar sī tanī hai

kyā gul-badanī gul-badanī gul-badanī hai

kis darja fusun-kar wo allah ghani hai

kya mauja-e-tabindagi o sim-tani hai

andaz hai ya jazba-e-gardun-zadani hai

aawaz hai ya barbat-e-iman-shikni hai

jangal ki siyah raat hai ya zulf ghani hai

kya gul-badani gul-badani gul-badani hai

ye lai hai ki khilti hui ghunche ki kamani

mahka hua ye tan hai ki ye raat ki rani

lahje ki ye rau hai ki barasta hua pani

larzish mein ye mizhgan hai ki pariyon ki kahani

ye surKHi-e-lab hai ki aqiq-e-yamani hai

kya gul-badani gul-badani gul-badani hai

mehrab hai ruKHsar ke partaw se zar-afshan

zulfon mein shab-e-tar hai aankhon mein charaghan

mehndi ki sajawaT ki hatheli pe gulistan

ya halqa-e-ushshaq mein hai chehra-e-taban

ya KHatam-e-tabinda pe hire ki kani hai

kya gul-badani gul-badani gul-badani hai

sine pe ye pallu hai ki ek mauj-e-hayabi

matha hai ki ek subh ka partaw hai shahabi

aankhen hain ki bahke hue do mast sharabi

paikar hai ki insan ke sanche mein gulabi

gesu hain ki gul-bazi-e-mushk-e-KHutani hai

kya gul-badani gul-badani gul-badani hai

kakul mein daraKHshan hai ye peshani-e-raqsan

ya saya-e-zulmat mein hai chashma-e-haiwan

hathon pe hai ye chehra ki hai rehl pe quran

aur chehra-e-gul-rang mein ghaltan o KHaroshan

raKHshandagi-e-KHun-e-rag-e-yasimani hai

kya gul-badani gul-badani gul-badani hai

ishwe hain ki ek fauj khaDi luT rahi hai

chhal-bal hai ki chhati ko zamin kuT rahi hai

angDai ka KHam hai ki dhanak TuT rahi hai

mukhDa hai ki parbat pe kiran phuT rahi hai

qamat hai ki barnai-e-sarw-e-chamani hai

kya gul-badani gul-badani gul-badani hai

tan mein hai wo KHushbu ki hain gul sar-ba-gareban

chehre pe wo surKHi hai ki hairan gulistan

wo chaal mein hai loch ki shaKHen hain pasheman

aur lal-e-guhar-bar pe wo naghma hai ghaltan

wo naghma ki ek walwala-e-shoala-zani hai

kya gul-badani gul-badani gul-badani hai

gardan mein chandan-haar hai hathon mein hai kangan

umDe hue ishwe hain garajta hua jauban

jaulan hai jawani ke dhundalke mein laDakpan

kora hai jo pinDa to junun-KHez hai ubTab

gul-rang shaluka hai qaba nardani hai

kya gul-badani gul-badani gul-badani hai

KHalwat mein wo taslim hai jalwat mein tahakkum

sahil pe subuk-mauj safine mein talatum

hujre mein KHamoshi hai shabistan mein takallum

KHeme mein tunuk aah KHayalon mein tarannum

aaghosh mein talwar hai ghunghaT mein bani hai

kya gul-badani gul-badani gul-badani hai

har naqsh-e-qadam par hai fida taj-e-kayani

har gam mein hai chashma-e-kausar ki rawani

har ek bun-e-mu se ubalti hai jawani

uThti hai masamat se yun bhap si dhani

goya koi mahki hui chadar si tani hai

kya gul-badani gul-badani gul-badani hai