kyun

tum jo qātil na masīhā Thahre

na ilāj-e-shab-e-hijrāñ na ġham-e-chārāgarāñ

na koī dushna-e-pinhāñ

na kahīñ ḳhanjar-e-sam-ālūda

na qarīb-e-rag-e-jāñ

tum to us ahd ke insāñ ho jise

vādī-e-marg meñ jiine kā hunar aatā thā

muddatoñ pahle bhī jab raḳht-e-safar bāñdhā thā

haath jab dast-e-duā the apne

paañv zanjīr ke halqoñ se kaTe jaate the

lafz taqsīr the

āvāz pe ta.azīreñ thiiñ

tum ne ma.asūm jasārat kī thī

ik tamannā kī ibādat kī thī

pā barahna the tumhāre

yahī bosīda qabā thī tan par

aur yahī surḳh lahū ke dhabbe

jinheñ tahrīr-e-gul-o-lāla kahā thā tum ne

har nazzāra pe nazzārgī-e-jāñ tum ko

har galī kūcha-e-mahbūb nazar aa.ī thī

raat ko zulf se tābīr kiyā thā tum ne

tum bhalā kyuuñ rasan-o-dār tak aa pahuñche ho

tum na mansūr na iisā Thahre

tum jo qatil na masiha Thahre

na ilaj-e-shab-e-hijran na gham-e-chaaragaran

na koi dushna-e-pinhan

na kahin KHanjar-e-sam-aluda

na qarib-e-rag-e-jaan

tum to us ahd ke insan ho jise

wadi-e-marg mein jine ka hunar aata tha

muddaton pahle bhi jab raKHt-e-safar bandha tha

hath jab dast-e-dua the apne

panw zanjir ke halqon se kaTe jate the

lafz taqsir the

aawaz pe taziren thin

tum ne masum jasarat ki thi

ek tamanna ki ibaadat ki thi

pa barahna the tumhaare

yahi bosida qaba thi tan par

aur yahi surKH lahu ke dhabbe

jinhen tahrir-e-gul-o-lala kaha tha tum ne

har nazzara pe nazzargi-e-jaan tum ko

har gali kucha-e-mahbub nazar aai thi

raat ko zulf se tabir kiya tha tum ne

tum bhala kyun rasan-o-dar tak aa pahunche ho

tum na mansur na isa Thahre