la-unwan

vo an-ginat ḳhat

jo kitnī hī zindagiyoñ meñ

maiñ ne tumheñ likhe the

aur tum ne har ek ḳhat

muskurāte hañste rote

ka.ī ka.ī baar paḌhā

aur uThā kar rakh diyā

ek baar aur paḌhne ko

jaise ye ḳhat hī tumhārā aur merā sab kuchh hoñ

in ḳhatoñ meñ ham ne ka.ī rang Dhāle

safed pākīzgī sabz tāzgī

surḳh tamāzat aur niilī gahrā.ī

tum aur maiñ har rang meñ Duub kar tair kar

laḌkhaḌāte aur sambhalte rahe

ka.ī hasīn ḳhvāb bune ka.ī toḌe

phir ek din achānak

tūfān ke ek jhoñke se

paanī ke vo tamām rang

jin meñ ham tum aur maiñ

utar kar Dūbte aur tairte the

aag ke rang meñ Dhal ga.e

jis meñ mere vo saare ḳhat

jal kar raakh ho ga.e

aur tumhārī āñkhoñ meñ tairte āñsūon ke parde meñ

maiñ ne ek dabī sī muskān

kī parchhā.īñ dekhī

wo an-ginat KHat

jo kitni hi zindagiyon mein

main ne tumhein likhe the

aur tum ne har ek KHat

muskuraate hanste rote

kai kai bar paDha

aur uTha kar rakh diya

ek bar aur paDhne ko

jaise ye KHat hi tumhaara aur mera sab kuchh hon

in KHaton mein hum ne kai rang Dhaale

safed pakizgi sabz tazgi

surKH tamazat aur nili gahrai

tum aur main har rang mein Dub kar tair kar

laDkhaDate aur sambhalte rahe

kai hasin KHwab bune kai toDe

phir ek din achanak

tufan ke ek jhonke se

pani ke wo tamam rang

jin mein hum tum aur main

utar kar Dubte aur tairte the

aag ke rang mein Dhal gae

jis mein mere wo sare KHat

jal kar rakh ho gae

aur tumhaari aankhon mein tairte aansuon ke parde mein

main ne ek dabi si muskan

ki parchhain dekhi