layal-pur

lāyal-pūr ik shahr hai jis meñ dil hai mirā ābād

dhaḌkan dhaḌkan saath rahegī us bastī kī yaad

mīThe boloñ kī vo nagrī gītoñ kā sansār

hañste-baste haa.e vo raste naġhma-rez dayār

vo galiyāñ vo phuul vo kaliyāñ rañg-bhare bāzār

maiñ ne un galiyoñ phūloñ kaliyoñ se kiyā hai pyaar

barg-e-āvāra meñ bikhrī hai jis kī rūdād

lāyal-pūr ik shahr hai jis meñ dil hai mirā ābād

koī nahīñ thā kaam mujhe phir bhī thā kitnā kaam

un galiyoñ meñ phirte rahnā din ko karnā shaam

ghar ghar mere sher ke charche ghar ghar meñ badnām

rātoñ ko dahlīzoñ pe hī kar lenā ārām

dukh sahne meñ chup rahne meñ dil thā kitnā shaad

lāyal-pūr ik shahr hai jis meñ dil hai mirā ābād

maiñ ne us nagrī rah kar kyā kyā giit likhe

jin ke kāran logoñ ke man meñ hai merī priit

ek lagan kī baat hai jīvan kaisī haar aur jiit

sab se mujh ko pyaar hai 'jālib' sab haiñ mere miit

daad to un kī yaad hai mujh ko bhuul gayā be-dād

lāyal puur ik shahr hai jis meñ dil hai mirā ābād

layal-pur ek shahr hai jis mein dil hai mera aabaad

dhaDkan dhaDkan sath rahegi us basti ki yaad

miThe bolon ki wo nagri giton ka sansar

hanste-baste hae wo raste naghma-rez dayar

wo galiyan wo phul wo kaliyan rang-bhare bazar

main ne un galiyon phulon kaliyon se kiya hai pyar

barg-e-awara mein bikhri hai jis ki rudad

layal-pur ek shahr hai jis mein dil hai mera aabaad

koi nahin tha kaam mujhe phir bhi tha kitna kaam

un galiyon mein phirte rahna din ko karna sham

ghar ghar mere sher ke charche ghar ghar mein badnam

raaton ko dahlizon pe hi kar lena aaram

dukh sahne mein chup rahne mein dil tha kitna shad

layal-pur ek shahr hai jis mein dil hai mera aabaad

main ne us nagri rah kar kya kya git likhe

jin ke karan logon ke man mein hai meri prit

ek lagan ki baat hai jiwan kaisi haar aur jit

sab se mujh ko pyar hai 'jalib' sab hain mere mit

dad to un ki yaad hai mujh ko bhul gaya be-dad

layal pur ek shahr hai jis mein dil hai mera aabaad