lab-bastagi

suno gurez karo aaj kuchh bhī kahne se

'ajīb vaqt ke dhāre badal rahe haiñ abhī

ye gardishoñ ke tamāshe hatheliyoñ ke fareb

shikasta zaat ke hairat gazīda goshoñ ko

batā rahe haiñ sitāre badal rahe haiñ abhī

abhī to sabr ke ḳhemoñ kī in tanāboñ ko

burīdagī liye hāthoñ se thāmnā hogā

abhī to bād-e-muḳhālif ke in thapeḌoñ ko

bikhartī ḳhaak ke zarroñ se roknā hogā

suno gurez karo aaj kuchh bhī kahne se

ye lamha sā'at-e-be-iḳhtiyār hai jānāñ

yahāñ gumāñ ke qabīle yaqīñ ko Dhāte haiñ

yahī hai maqtal-e-be-āb reg-e-dasht-e-balā

jahāñ pe tishna-labāñ eḌiyāñ ragaḌte hue

kisī ke 'ishq meñ duniyā se haare jaate haiñ

suno gurez karo aaj kuchh bhī kahne se

ki aaj dhuup kā lahja bhī intiqāmī hai

chhupā lo haath se chehre kī vahshatoñ ke nuqūsh

ki ab hadaf hī ujāle kā be-naqābī hai

sapedī-e-saharī se gurez-pā nāchār

siyāhī-e-shab-e-vīrāñ meñ Dhalte jaate haiñ

du'ā du'ā kī sadāoñ se dam ulajhtā hai

ki ab to haath bhī kashkol hote jaate haiñ

suno gurez karo aaj kuchh bhī kahne se

suno ki zahr ke pyāle chhalak rahe haiñ abhī

uThānā jin ko vafāoñ kā farz hotā hai

ye ham jo palkoñ pe aañsū sajā.e phirte haiñ

ye zindagī kī bahāroñ kā qarz hotā hai

suno sukūt ke pahlū talāshtī hai hayāt

abhī saroñ se guzarne do in ġhubāroñ ko

Thaharne do abhī be-rabt ābshāroñ ko

jahān-e-saut-o-sadā ḳhāmushī kā tālib hai

'safar' zabāñ pe kisī harf ko jagah na mile

yahāñ kalām nahīñ bas sukūt vājib hai

suno gurez karo aaj kuchh bhi kahne se

'ajib waqt ke dhaare badal rahe hain abhi

ye gardishon ke tamashe hatheliyon ke fareb

shikasta zat ke hairat gazida goshon ko

bata rahe hain sitare badal rahe hain abhi

abhi to sabr ke KHemon ki in tanabon ko

buridagi liye hathon se thamna hoga

abhi to baad-e-muKHalif ke in thapeDon ko

bikharti KHak ke zarron se rokna hoga

suno gurez karo aaj kuchh bhi kahne se

ye lamha sa'at-e-be-iKHtiyar hai jaanan

yahan guman ke qabile yaqin ko Dhate hain

yahi hai maqtal-e-be-ab reg-e-dasht-e-bala

jahan pe tishna-laban eDiyan ragaDte hue

kisi ke 'ishq mein duniya se haare jate hain

suno gurez karo aaj kuchh bhi kahne se

ki aaj dhup ka lahja bhi intiqami hai

chhupa lo hath se chehre ki wahshaton ke nuqush

ki ab hadaf hi ujale ka be-naqabi hai

sapedi-e-sahari se gurez-pa nachaar

siyahi-e-shab-e-viran mein Dhalte jate hain

du'a du'a ki sadaon se dam ulajhta hai

ki ab to hath bhi kashkol hote jate hain

suno gurez karo aaj kuchh bhi kahne se

suno ki zahr ke pyale chhalak rahe hain abhi

uThana jin ko wafaon ka farz hota hai

ye hum jo palkon pe aansu sajae phirte hain

ye zindagi ki bahaaron ka qarz hota hai

suno sukut ke pahlu talashti hai hayat

abhi saron se guzarne do in ghubaron ko

Thaharne do abhi be-rabt aabshaaron ko

jahan-e-saut-o-sada KHamushi ka talib hai

'safar' zaban pe kisi harf ko jagah na mile

yahan kalam nahin bas sukut wajib hai