mazdur be-chaara

hotā nahīñ dam-bhar bhī sukūñ us ko gavārā

jis ḳhātir-e-betāb kī fitrat hī hai paarā

mazlūm kī fariyād se jal jā.egā aalam

sad-shoa.la-ba-damāñ hai un aahoñ kā sharārā

ġham-dīdoñ ko de aish-o-tarab aur atā kar

tāj-e-sar-e-sultānī-e-taimūr gadā-rā

garmā de rageñ us kī imārat ke lahū se

jis hastī-e-be-māya kā ġhurbat hai sahārā

taḳhrīb ke bandoñ ko bas ab ho nahīñ saktī

insān kī insān se tafrīq gavārā

pāband sahī dahr meñ ā.īn-e-jahāñ ke

pīrān-e-kalīsā kā hai kyā us meñ ijārā

tahzīb-o-tamaddun haiñ imārat ke sahāre

mazdūr kī ġhurbat kā nahīñ koī sahārā

hota nahin dam-bhar bhi sukun us ko gawara

jis KHatir-e-betab ki fitrat hi hai para

mazlum ki fariyaad se jal jaega aalam

sad-shoala-ba-daman hai un aahon ka sharara

gham-didon ko de aish-o-tarab aur ata kar

taj-e-sar-e-sultani-e-taimur gada-ra

garma de ragen us ki imarat ke lahu se

jis hasti-e-be-maya ka ghurbat hai sahaara

taKHrib ke bandon ko bas ab ho nahin sakti

insan ki insan se tafriq gawara

paband sahi dahr mein aain-e-jahan ke

piran-e-kalisa ka hai kya us mein ijara

tahzib-o-tamaddun hain imarat ke sahaare

mazdur ki ghurbat ka nahin koi sahaara