laDaku chiDa

mere kamre ke baḌe taaq meñ ik ā.īna

sūrateñ sab ko dikhāne ke liye rakkhā hai

sāmne aa.ine ke baiTh ke roz ek chiḌā

jaane kyuuñ aks se apne hī laḌā kartā hai

kabhī panjoñ se kabhī choñch se hamle kar ke

ye samajhtā hai use jiit yaqīnī hogī

is himāqat se agar baaz nahīñ aa.egā

choñch kyā us kī to rag rag kabhī zaḳhmī hogī

jab koī kaam na hogā use laḌne ke sivā

saañs bhī le na sakegā kabhī be-ḳhauf-o-hirās

phir kisī din ye tamāshā bhī nazar aa.egā

nannhī sī laash paḌī hogī us aa.ine ke paas

sochtā huuñ ki mire mulk ke lākhoñ bachche

roz aapas meñ isī tarah laḌā karte haiñ

fā.eda is se kisī ko bhī nahīñ hotā hai

kuchh na kuchh apnā hī nuqsān kiyā karte haiñ

yahī aadat jo banā lī to vo din bhī hai qarīb

chain se rah na sakeñge ye laḌā.ī ke baġhair

koī bhī paas se guzrā to ḳhushī kā kyā zikr

kuchh bhī to kah na sakeñge ye laḌā.ī ke baġhair

be-sabab laḌne ke jazbe ko jo rokā na gayā

log aaqil hoñ ki nādān laḌe jā.eñge

apnī fitrat hī banā leñge jo bāham laḌnā

jānvar hoñ ki hoñ insān laḌe jā.eñge

vo muḳhālif na sahī apnā koī aks sahī

mil hī jā.egā unheñ koī jhagaḌne ke liye

aa.ine sāmne rakh kar yahī sarkash bachche

baiTh jā.eñge har ik sub.h ko laḌne ke liye

sab rahe jā.eñge aapas meñ agar mil-jul kar

har jagah mulk meñ gulzār nazar ā.eñge

aur agar buġhz-o-adāvat kā yahī josh rahā

jā-ba-jā lāshoñ ke ambār nazar ā.eñge

mere kamre ke baDe taq mein ek aaina

suraten sab ko dikhane ke liye rakkha hai

samne aaine ke baiTh ke roz ek chiDa

jaane kyun aks se apne hi laDa karta hai

kabhi panjon se kabhi chonch se hamle kar ke

ye samajhta hai use jit yaqini hogi

is himaqat se agar baz nahin aaega

chonch kya us ki to rag rag kabhi zaKHmi hogi

jab koi kaam na hoga use laDne ke siwa

sans bhi le na sakega kabhi be-KHauf-o-hiras

phir kisi din ye tamasha bhi nazar aaega

nannhi si lash paDi hogi us aaine ke pas

sochta hun ki mere mulk ke lakhon bachche

roz aapas mein isi tarah laDa karte hain

faeda is se kisi ko bhi nahin hota hai

kuchh na kuchh apna hi nuqsan kiya karte hain

yahi aadat jo bana li to wo din bhi hai qarib

chain se rah na sakenge ye laDai ke baghair

koi bhi pas se guzra to KHushi ka kya zikr

kuchh bhi to kah na sakenge ye laDai ke baghair

be-sabab laDne ke jazbe ko jo roka na gaya

log aaqil hon ki nadan laDe jaenge

apni fitrat hi bana lenge jo baham laDna

jaanwar hon ki hon insan laDe jaenge

wo muKHalif na sahi apna koi aks sahi

mil hi jaega unhen koi jhagaDne ke liye

aaine samne rakh kar yahi sarkash bachche

baiTh jaenge har ek subh ko laDne ke liye

sab rahe jaenge aapas mein agar mil-jul kar

har jagah mulk mein gulzar nazar aaenge

aur agar bughz-o-adawat ka yahi josh raha

ja-ba-ja lashon ke ambar nazar aaenge