laDkiyan

laḌkiyāñ ghar meñ parindoñ kī tarah hotī haiñ

ek din shāḳh se uḌ jaatī haiñ

aur māñ-bāp ko taḌpātī haiñ

laḌkiyāñ khilte gulāboñ kī tarah hotī haiñ

āñganoñ aur dar-o-dīvār ko mahkātī haiñ

sej par ajnabī dam-sāz kī bichh jaatī haiñ

laḌkiyāñ qissoñ kī pariyoñ kī tarah hotī haiñ

ḳhvāb ban kar kabhī āñkhoñ meñ samā jaatī haiñ

āñkhoñ se dil meñ utar jaatī haiñ

laḌkiyāñ shīsha-o-sāġhar kī tarah hotī haiñ

ḳhud bahaktī nahīñ bahkātī haiñ

Thes lagte hī chhalak jaatī haiñ

laḌkiyāñ mom kī mūrat kī tarah hotī haiñ

lams kī aañch se bāñhoñ meñ pighal jaatī haiñ

aur kabhī zinda bhī jal jaatī haiñ

laḌkiyāñ mehñdī ke pattoñ kī tarah hotī haiñ

pistī jaatī haiñ magar rang hī chhalkātī haiñ

kabhī bāzār meñ bik jaatī haiñ

laḌkiyāñ band kitāboñ kī tarah hotī haiñ

in ko paḌhiye to sahīfoñ kā gumāñ hotā hai

phir magar niiñd kahāñ chain kahāñ hotā hai

laDkiyan ghar mein parindon ki tarah hoti hain

ek din shaKH se uD jati hain

aur man-bap ko taDpati hain

laDkiyan khilte gulabon ki tarah hoti hain

aanganon aur dar-o-diwar ko mahkati hain

sej par ajnabi dam-saz ki bichh jati hain

laDkiyan qisson ki pariyon ki tarah hoti hain

KHwab ban kar kabhi aankhon mein sama jati hain

aankhon se dil mein utar jati hain

laDkiyan shisha-o-saghar ki tarah hoti hain

KHud bahakti nahin bahkati hain

Thes lagte hi chhalak jati hain

laDkiyan mom ki murat ki tarah hoti hain

lams ki aanch se banhon mein pighal jati hain

aur kabhi zinda bhi jal jati hain

laDkiyan mehndi ke patton ki tarah hoti hain

pisti jati hain magar rang hi chhalkati hain

kabhi bazar mein bik jati hain

laDkiyan band kitabon ki tarah hoti hain

in ko paDhiye to sahifon ka guman hota hai

phir magar nind kahan chain kahan hota hai