lafzon ke darmiyan

dekhte hī dekhte unhoñ ne sayyāre ko lafzoñ se bhar diyā

faisloñ aur fāsloñ ko tuul dene kā fan unheñ ḳhuub aatā hai

jahāz bandar-gāhoñ meñ khaḌe haiñ

aur gharoñ, godāmoñ, dukānoñ meñ

kisī lafz ke liye jagah nahīñ rahī

itne bahut se lafz... uff ḳhudāyā!

mujhe is zamīn par chalte hue aThThā.īs baras ho ga.e

baap, maañ, bahnoñ, bhā.iyoñ aur mahbūbāoñ ke darmiyān

insānoñ ke darmiyān

maiñ ne dekhā

in ta.arīfoñ, ta.ārufoñ aur ta.aziyatoñ ke liye

un ke paas larazte hue hoñT haiñ

DabDabā.ī huī āñkheñ haiñ

garm hatheliyāñ haiñ

unheñ kisī iblāġh kī zarūrat nahīñ

nān-bā.ī gungunātā hai

use lafz nahīñ chāhiye

ek naand... aaTā ghūñdhne ke liye

ek taḳhta... peḌe banāne ke liye

ek salāḳh tannūr se roTī nikālne ke liye

nān-bā.ī kā kaam ḳhatm kar lo to mere paas aanā

yahāñ kināre par sarkandoñ kā jañgal aap hī aap ug aayā hai

kuchh qalam maiñ ne tarāshe haiñ

aur ek bāñsurī...

baaqī sarkandoñ se ek kashtī banā.ī hai

gaDaryā, kisān, kāshtkār, mausīqār, āhan-gar

sab tayyār haiñ

kuchh āvāzeñ kashtī meñ rakh lī haiñ

madrase kī ghanTī...

ek lorī

aur ek duā

ek na.ī zamīn par zinda rahne ke liye is se ziyāda kuchh nahīñ chāhiye

dekhte hi dekhte unhon ne sayyare ko lafzon se bhar diya

faislon aur faslon ko tul dene ka fan unhen KHub aata hai

jahaz bandar-gahon mein khaDe hain

aur gharon, godamon, dukanon mein

kisi lafz ke liye jagah nahin rahi

itne bahut se lafz uff KHudaya!

mujhe is zamin par chalte hue aThThais baras ho gae

bap, man, bahnon, bhaiyon aur mahbubaon ke darmiyan

insanon ke darmiyan

main ne dekha

in tarifon, taarufon aur taziyaton ke liye

un ke pas larazte hue honT hain

DabDabai hui aankhen hain

garm hatheliyan hain

unhen kisi iblagh ki zarurat nahin

nan-bai gungunata hai

use lafz nahin chahiye

ek nand aaTa ghundhne ke liye

ek taKHta peDe banane ke liye

ek salaKH tannur se roTi nikalne ke liye

nan-bai ka kaam KHatm kar lo to mere pas aana

yahan kinare par sarkandon ka jangal aap hi aap ug aaya hai

kuchh qalam main ne tarashe hain

aur ek bansuri

baqi sarkandon se ek kashti banai hai

gaDarya, kisan, kashtkar, mausiqar, aahan-gar

sab tayyar hain

kuchh aawazen kashti mein rakh li hain

madrase ki ghanTi

ek lori

aur ek dua

ek nai zamin par zinda rahne ke liye is se ziyaada kuchh nahin chahiye