lakhnau

ḳhudā ābād rakhe lakhna.ū ko

hamesha shaad rakhe lakhna.ū ko

ye bastī ḳhūbsūrat hai hasīñ hai

kahīñ is shahar kā saanī nahīñ hai

hai baḌh kar ḳhuld se har baaġh is kā

amīnābād-o-qiasar-bāġh is kā

hai phūloñ kī mahak saarī fazā meñ

bahāreñ kheltī haiñ is havā meñ

ravāñ hai gomtī dilkash adā se

bahaltī hai tabī.at is fazā se

hai is kī shaam kī shohrat jahāñ meñ

nazīr is kī kahāñ hindostāñ meñ

nihāyat ḳhushnumā hai saarī bastī

avadh kī jaan hai ye pyārī bastī

bahut sī haiñ purānī yādgāreñ

purānī par suhānī yādgāreñ

hamāre mulk kī urdu zabāñ hai

zabāñ is shahar kī sī par kahāñ hai

bahut shusta zabāñ hai lakhna.ū kī

jo hai urdu vo jaañ hai lakhna.ū kī

KHuda aabaad rakhe lakhnau ko

hamesha shad rakhe lakhnau ko

ye basti KHubsurat hai hasin hai

kahin is shahar ka sani nahin hai

hai baDh kar KHuld se har bagh is ka

aminabaad-o-qiasar-bagh is ka

hai phulon ki mahak sari faza mein

bahaaren khelti hain is hawa mein

rawan hai gomti dilkash ada se

bahalti hai tabiat is faza se

hai is ki sham ki shohrat jahan mein

nazir is ki kahan hindostan mein

nihayat KHushnuma hai sari basti

awadh ki jaan hai ye pyari basti

bahut si hain purani yaadgaren

purani par suhani yaadgaren

hamare mulk ki urdu zaban hai

zaban is shahar ki si par kahan hai

bahut shusta zaban hai lakhnau ki

jo hai urdu wo jaan hai lakhnau ki