lamha

ek sulgī huī sī dhaḌkan par

kapkapāte larazte hoñToñ se

jism bhar par hurūf ugte haiñ

ḳhāmushī ko zabān miltī hai

lau pighal kar badan meñ ghultī hai

ruuh meñ aks ugne lagte haiñ

aa.ine par sarāb chalte haiñ

qatra qatra pighalte jazboñ par

rafta rafta phuvār paḌhtī hai

vaqt kī nabz tez chaltī hai

har gunāh-o-savāb se aage

āyat-e-be-ḳhudī kī sarhad par

barf se bhaap tak ke raste par

qurb-e-tahlīliyat kī manzil par

vasl-e-mālūmiyat ke hāsil par

ek lamha Thahar sā jaatā hai

zindagī sirf ek lamha hai

ek sulgi hui si dhaDkan par

kapkapate larazte honTon se

jism bhar par huruf ugte hain

KHamushi ko zaban milti hai

lau pighal kar badan mein ghulti hai

ruh mein aks ugne lagte hain

aaine par sarab chalte hain

qatra qatra pighalte jazbon par

rafta rafta phuwar paDhti hai

waqt ki nabz tez chalti hai

har gunah-o-sawab se aage

aayat-e-be-KHudi ki sarhad par

barf se bhap tak ke raste par

qurb-e-tahliliyat ki manzil par

wasl-e-malumiyat ke hasil par

ek lamha Thahar sa jata hai

zindagi sirf ek lamha hai