lamhon ki parastar

maiñ ne chāhā thā use ruuh kī rāhat ke liye

aaj vo jaan kā āzār banī baiThī hai

merī ā.ankhoñ ne jise phuul se nāzuk samjhā

ab vo chaltī huī talvār banī baiThī hai

ham-safar ban ke jise naaz thā hamrāhī par

rahzanoñ kī vo taraf-dār banī baiThī hai

kisī afsāne kā kirdār banī baiThī hai

us kī ma.asūmiyat-e-dil pe bharosa thā mujhe

azm-e-sītā kī qasam ismat-e-maryam kī qasam

yaad haiñ us ke vo hañste hue aañsū mujh ko

ḳhanda-e-gul kī qasam girya-e-shabnam kī qasam

us ne jo kuchh bhī kahā maiñ ne vahī maan liyā

hukm-e-havvā kī qasam jazba-e-ādam kī qasam

paak thī ruuh mirī chashma-e-zamzam kī qasam

maiñ ne chāhā thā use dil meñ chhupā luuñ aise

jism meñ jaise lahū siip meñ jaise motī

umr bhar maiñ na jhapaktā kabhī apnī āñhkeñ

mere zānūñ pe vo sar rakh ke hamesha sotī

sham-e-yak-shab to samajhtā hai use ek jahāñ

kaash ho jaatī vo mere liye jīvan-jotī

dar-ba-dar us kī tamāzat na pareshāñ hotī

maiñ use le ke bahut duur nikal jā.ūñ magar

vo mirī raah meñ dīvār banī baiThī hai

zindagī bhar kī parastish use manzūr nahīñ

vo to lamhoñ kī parastār banī baiThī hai

maiñ ne chāhā thā use ruuh kī rāhat ke liye

vo magar jaan kā āzār banī baiThī hai

kisī afsāne kā kirdār banī baiThī hai

main ne chaha tha use ruh ki rahat ke liye

aaj wo jaan ka aazar bani baiThi hai

meri aaankhon ne jise phul se nazuk samjha

ab wo chalti hui talwar bani baiThi hai

ham-safar ban ke jise naz tha hamrahi par

rahzanon ki wo taraf-dar bani baiThi hai

kisi afsane ka kirdar bani baiThi hai

us ki masumiyat-e-dil pe bharosa tha mujhe

azm-e-sita ki qasam ismat-e-maryam ki qasam

yaad hain us ke wo hanste hue aansu mujh ko

KHanda-e-gul ki qasam girya-e-shabnam ki qasam

us ne jo kuchh bhi kaha main ne wahi man liya

hukm-e-hawwa ki qasam jazba-e-adam ki qasam

pak thi ruh meri chashma-e-zamzam ki qasam

main ne chaha tha use dil mein chhupa lun aise

jism mein jaise lahu sip mein jaise moti

umr bhar main na jhapakta kabhi apni aanhken

mere zanun pe wo sar rakh ke hamesha soti

sham-e-yak-shab to samajhta hai use ek jahan

kash ho jati wo mere liye jiwan-joti

dar-ba-dar us ki tamazat na pareshan hoti

main use le ke bahut dur nikal jaun magar

wo meri rah mein diwar bani baiThi hai

zindagi bhar ki parastish use manzur nahin

wo to lamhon ki parastar bani baiThi hai

main ne chaha tha use ruh ki rahat ke liye

wo magar jaan ka aazar bani baiThi hai

kisi afsane ka kirdar bani baiThi hai