lams-e-aKHiri

na rovo jabr kā aadī huuñ mujh pe rahm karo

tumheñ qasam mirī vārafta zindagī kī qasam

na rovo baal bikhero na tum ḳhudā ke liye

añdherī raat meñ jugnū kī raushnī kī qasam

maiñ kah rahā huuñ na rovo ki mujh ko hosh nahīñ

yahī to ḳhauf hai aañsū mujhe bahā deñge

maiñ jāntā huuñ ki ye sail bhī sharāre haiñ

mirī hayāt kī har aarzū jalā deñge

na itnā rovo ye qindīl bujh na jaa.e kahīñ

ise ḳhud apnā lahū de ke maiñ jalātā huuñ

jo ham ne mil ke uThā.e the vo mahal baiThe

ab apne haath se miTTī kā ghar banātā huuñ

tumhāre vāste shabnam nichoḌ saktā huuñ

zar o javāhir o gauhar kahāñ se lā.ūñ maiñ

tumhāre husn ko ash.ār meñ sajā dūñgā

tumhāre vāste zevar kahāñ se lā.ūñ maiñ

hasīn mez subuk jaam qīmtī fānūs

mujhe ye shak hai maiñ kuchh bhī to de nahīñ saktā

ġhulām aur ye shā.er kā jazba-e-āzād

maiñ apne sar pe ye ehsān le nahīñ saktā

mujhe yaqīn hai tum mujh ko muaaf kar dogī

ki ham ne saath jalā.e the zindagī ke kañval

ab is ko kyā karūñ dushman kī jiit ho jaa.e

hamāre sar pe baras jaa.e yaas kā bādal

na rovo dekho mirī saañs thartharātī hai

qarīb aao maiñ aañsū to poñchh kar dekhūñ

suno to soī huī zindagī bhī chīḳh uTThe

qarīb aao vahī baat kaan meñ kah duuñ

na rovo merī siyah-baḳhtiyoñ pe mat rovo

tumheñ qasam mirī āshufta-ḳhātirī kī qasam

miTā do āriz-e-tābāñ ke bad-numā dhabbe

tumhāre hoñToñ pe us lams-e-āḳhirī kī qasam

na rowo jabr ka aadi hun mujh pe rahm karo

tumhein qasam meri warafta zindagi ki qasam

na rowo baal bikhero na tum KHuda ke liye

andheri raat mein jugnu ki raushni ki qasam

main kah raha hun na rowo ki mujh ko hosh nahin

yahi to KHauf hai aansu mujhe baha denge

main jaanta hun ki ye sail bhi sharare hain

meri hayat ki har aarzu jala denge

na itna rowo ye qindil bujh na jae kahin

ise KHud apna lahu de ke main jalata hun

jo hum ne mil ke uThae the wo mahal baiThe

ab apne hath se miTTi ka ghar banata hun

tumhaare waste shabnam nichoD sakta hun

zar o jawahir o gauhar kahan se laun main

tumhaare husn ko ashaar mein saja dunga

tumhaare waste zewar kahan se laun main

hasin mez subuk jam qimti fanus

mujhe ye shak hai main kuchh bhi to de nahin sakta

ghulam aur ye shaer ka jazba-e-azad

main apne sar pe ye ehsan le nahin sakta

mujhe yaqin hai tum mujh ko muaf kar dogi

ki hum ne sath jalae the zindagi ke kanwal

ab is ko kya karun dushman ki jit ho jae

hamare sar pe baras jae yas ka baadal

na rowo dekho meri sans thartharaati hai

qarib aao main aansu to ponchh kar dekhun

suno to soi hui zindagi bhi chiKH uTThe

qarib aao wahi baat kan mein kah dun

na rowo meri siyah-baKHtiyon pe mat rowo

tumhein qasam meri aashufta-KHatiri ki qasam

miTa do aariz-e-taban ke bad-numa dhabbe

tumhaare honTon pe us lams-e-aKHiri ki qasam