landscape

tum log yahāñ baiThe ho

tum log yahāñ is liye baiThe ho ki

jo tum meñ se yahāñ nahīñ hai

use vahāñ se uThā diyā gayā hai

tum meñ se koī portugal nahīñ gayā

lekin tumhāre darmiyān mez aur kursiyāñ haiñ

jo duniyā tum ko dikhāne ke liye kaafī hai

is se baḌh kar bhī koī dukh hogā

jitnā sochoge bhūlte jāoge

masla

mausīqī yā aurteñ aur āb-o-havā bachche

aḳhbār yā ġhizāoñ ke naam

yahāñ tak ki niiñd aa jaatī hai

yā vo ek būḌhā jis ke paañv

maidānoñ meñ chalte chalte ḳhatm hue

us kī fasl us ke purāne chehre ko

gaalī de us par pheñk dī ga.ī

nāriyal kā banā huā huqqa bhī aur us meñ jo jalā huā paanī hotā hai vo bhī tum log

us kamre meñ aa ga.e

tumhāre sāmne mez par ashtray meñ abhī abhī jabki mulk kī ghaḌiyoñ meñ raat ke 9 baj rahe haiñ

ek cigarette kā jaltā huā filter ḳhatm ho rahā hai

maiñ tum sab ke baare meñ bahut kuchh kahnā chāhtā huuñ kuchh bahut zarūrī bhed haiñ

lekin agar kah duuñ to bahut burā hogā

tumhārī gardaneñ mujhe insānī shakl meñ dikhā.ī nahīñ detīñ

ye gardaneñ jism kā filter haiñ

jism tafsīlāt meñ jal ga.e ab filter jal rahe haiñ

ye maiñ nahīñ batā.ūñgā ki tumheñ kis ne jalā jalā ke piyā

maz.hab ne is jism meñ tumhāre is kamre meñ jaise an-ginat kamre banā.e aur har kamra aag

jalā.e rakhne kī tarkīb batā.ī

maiñ tum meñ se ek thā tumhāre darmiyān musībat meñ ḳhudā kā naam sunā thā

karoḌoñ bhikāriyoñ ke diloñ ko sameT kar roTī kā ek sūkhā TukḌā māñgne ke liye use pukārā

kitāboñ meñ sachchā.ī ke do lafz paḌhne ke liye miTTī ke tel kī Dheriyāñ chār-pā.īyoñ par ulaT diiñ

merī ġharībī ke yādgār gudḌe aur bistar jal ga.e

zamīn par itne kañkar patthar īñTeñ bajrī aur baalū ke zarre bhī nahīñ hoge

jitnī merī raTī huī duā.eñ

ki auratoñ aur jānvaroñ se chhuTkārā mil jaa.e

baat ye ki maiñ khul kar ronā chāhtā thā

itnā ki tumhārī ābādiyoñ meñ bāzāroñ ke hujūm bhī nahīñ hoge aur laḌkoñ kī gāliyāñ jo nañge pāgaloñ ke pīchhe dauḌtī haiñ

suno maiñ use apne Dhañg se chāhtā thā

itnā ki ek arab nekiyoñ se bhare hue aspatāl bhī kaafī nahīñ

are maiñ jo ḳhudā māñgtā huuñ vo tum dete nahīñ

aag jalāne kī tarkīb to maiñ nahīñ jāntā

maiñ tum se kahtā huuñ mujhe jalāo yā merī nabātāt jalāo maiñ jalūñgā aur jalūñgā

kaam karūñgā aur kaam karūñgā

suno kaam karne ke liye ek aisī zindagī chāhiye ki maiñ tum sab ko bilā-vaj.h marne se rok sakūñ

zindagī kā kaam kabhī ruktā nahīñ

har-chand ki

burī bhiiḌ ke zamāna meñ achchhī kitābeñ likhne paḌhne ke mazbūt sāmān nāyāb ho jaate haiñ

daulat baḌe style se ishtihārī sukūn bāñTtī hai

microphone yā baap aur universitiyoñ meñ jab professor e.azāz kī sūliyoñ par ḳhush-gavār dikhā.ī dete haiñ

davā.eñ yā maa.eñ bahneñ

tab baḌā ġhalat añdherā hotā hai ġhalat beTe aur bhaa.ī

jinheñ binā-qīmat liye agar tum chhū lo to kāġhaz tumheñ pakaḌ leñge

kāġhaz tumheñ maar Dāleñge

yahī kāġhaz jin se tumhāre liye dhoke aur mustaqbil banāte haiñ

chalo is bhiiḌ se niklo

zindagī kā kaam kabhī ruktā nahīñ

paas aao

maiñ tumhārī jeboñ ke jhuuT se aaj tak Darā nahīñ huuñ

un meñ rakhe hue paise nikāl lūñgā

paise mat chhupāo paas aao

ye maiñ jāntā huuñ ki tumhārī bīviyāñ tumhārī maut ke agnet haiñ

tumhāre beTe aur bhaa.ī mujh se nafrat karte haiñ

maiñ tumhāre gharoñ ke Dare hue band darvāzoñ par dastak detā huuñ aur tum aur tumhāre log

andar se chillāte haiñ ki tum nahīñ ho

maiñ tumheñ marne se kyuuñ rokūñ har-chand ki rok saktā huuñ

maut kisī ko mārne ke liye āsmān se nahīñ utartī

maut is liye hai ki tum ne use āsmān maan liyā

zamīn tumheñ jāgne ke liye dī ga.ī tum ne use māyūs kiyā

maut zamīn kī māyūsī par aaj tak ḳhush hai

aur tumhāre ḳhvāboñ meñ chalne kī āzādī hai

tambākū afiim aur bhañg ke paude aaj tak ḳhush haiñ ki vo tumhārī marī huī maaoñ kī māmtā haiñ

tumhārī bahut sī bīmāriyāñ tumhāre jism meñ baḌe ārām se haiñ

aur davā-ḳhānoñ meñ bahut sī davā.eñ bhī baḌe ārām se haiñ

maiñ tumheñ marne se kaise rokūñ

haañ tum mujhe jiine se rokte ho

maiñ tum se kahtā huuñ ki tumhāre chhoḌe hue maidānoñ kī havāoñ ke jhoñke jab tumhārī khiḌkiyoñ meñ aa rahe hoñ to

khiḌkiyāñ mat band karo

baat ye hai ki tumhārā jam.a kiyā huā asāsa tumhāre jism ke ek ma.amūlī ro.eñ tak ko nahīñ chamkā saktā

tumhāre jam.a kiye hue ġhalat añdheroñ par jab sūraj chamaktā hai

to tum us se uktāte ho

tum mujhe bolne se rokte ho

maiñ kahtā huuñ tumhāre ye makān tumhārī aane vaalī qabroñ se muḳhtalif nahīñ

tum bainal-aqvāmī bichchhūoñ se ziyāda chālāk nahīñ

tum duniyā kī baḌī kitāboñ se ziyāda gambhīr nahīñ ho

jab tak maiñ tum se apne safar kā saarā sāmān chhīn nahīñ lūñgā tum se iḳhtilāf karūñgā

tumheñ marne se rokūñgā

tum log yahan baiThe ho

tum log yahan is liye baiThe ho ki

jo tum mein se yahan nahin hai

use wahan se uTha diya gaya hai

tum mein se koi portugal nahin gaya

lekin tumhaare darmiyan mez aur kursiyan hain

jo duniya tum ko dikhane ke liye kafi hai

is se baDh kar bhi koi dukh hoga

jitna sochoge bhulte jaoge

masla

mausiqi ya aurten aur aab-o-hawa bachche

aKHbar ya ghizaon ke nam

yahan tak ki nind aa jati hai

ya wo ek buDha jis ke panw

maidanon mein chalte chalte KHatm hue

us ki fasl us ke purane chehre ko

gali de us par phenk di gai

nariyal ka bana hua huqqa bhi aur us mein jo jala hua pani hota hai wo bhi tum log

us kamre mein aa gae

tumhaare samne mez par ashtray mein abhi abhi jabki mulk ki ghaDiyon mein raat ke 9 baj rahe hain

ek cigarette ka jalta hua filter KHatm ho raha hai

main tum sab ke bare mein bahut kuchh kahna chahta hun kuchh bahut zaruri bhed hain

lekin agar kah dun to bahut bura hoga

tumhaari gardanen mujhe insani shakl mein dikhai nahin detin

ye gardanen jism ka filter hain

jism tafsilat mein jal gae ab filter jal rahe hain

ye main nahin bataunga ki tumhein kis ne jala jala ke piya

mazhab ne is jism mein tumhaare is kamre mein jaise an-ginat kamre banae aur har kamra aag

jalae rakhne ki tarkib batai

main tum mein se ek tha tumhaare darmiyan musibat mein KHuda ka nam suna tha

karoDon bhikariyon ke dilon ko sameT kar roTi ka ek sukha TukDa mangne ke liye use pukara

kitabon mein sachchai ke do lafz paDhne ke liye miTTi ke tel ki Dheriyan chaar-paiyon par ulaT din

meri gharibi ke yaadgar gudDe aur bistar jal gae

zamin par itne kankar patthar inTen bajri aur baalu ke zarre bhi nahin hoge

jitni meri raTi hui duaen

ki auraton aur jaanwaron se chhuTkara mil jae

baat ye ki main khul kar rona chahta tha

itna ki tumhaari aabaadiyon mein bazaron ke hujum bhi nahin hoge aur laDkon ki galiyan jo nange pagalon ke pichhe dauDti hain

suno main use apne Dhang se chahta tha

itna ki ek arab nekiyon se bhare hue aspatal bhi kafi nahin

are main jo KHuda mangta hun wo tum dete nahin

aag jalane ki tarkib to main nahin jaanta

main tum se kahta hun mujhe jalao ya meri nabaatat jalao main jalunga aur jalunga

kaam karunga aur kaam karunga

suno kaam karne ke liye ek aisi zindagi chahiye ki main tum sab ko bila-wajh marne se rok sakun

zindagi ka kaam kabhi rukta nahin

har-chand ki

buri bhiD ke zamana mein achchhi kitaben likhne paDhne ke mazbut saman nayab ho jate hain

daulat baDe style se ishtihaari sukun banTti hai

microphone ya bap aur uniwersitiyon mein jab professor eazaz ki suliyon par KHush-gawar dikhai dete hain

dawaen ya maen bahnen

tab baDa ghalat andhera hota hai ghalat beTe aur bhai

jinhen bina-qimat liye agar tum chhu lo to kaghaz tumhein pakaD lenge

kaghaz tumhein mar Dalenge

yahi kaghaz jin se tumhaare liye dhoke aur mustaqbil banate hain

chalo is bhiD se niklo

zindagi ka kaam kabhi rukta nahin

pas aao

main tumhaari jebon ke jhuT se aaj tak Dara nahin hun

un mein rakhe hue paise nikal lunga

paise mat chhupao pas aao

ye main jaanta hun ki tumhaari biwiyan tumhaari maut ke agnet hain

tumhaare beTe aur bhai mujh se nafrat karte hain

main tumhaare gharon ke Dare hue band darwazon par dastak deta hun aur tum aur tumhaare log

andar se chillate hain ki tum nahin ho

main tumhein marne se kyun rokun har-chand ki rok sakta hun

maut kisi ko marne ke liye aasman se nahin utarti

maut is liye hai ki tum ne use aasman man liya

zamin tumhein jagne ke liye di gai tum ne use mayus kiya

maut zamin ki mayusi par aaj tak KHush hai

aur tumhaare KHwabon mein chalne ki aazadi hai

tambaku afim aur bhang ke paude aaj tak KHush hain ki wo tumhaari mari hui maon ki mamta hain

tumhaari bahut si bimariyan tumhaare jism mein baDe aaram se hain

aur dawa-KHanon mein bahut si dawaen bhi baDe aaram se hain

main tumhein marne se kaise rokun

han tum mujhe jine se rokte ho

main tum se kahta hun ki tumhaare chhoDe hue maidanon ki hawaon ke jhonke jab tumhaari khiDkiyon mein aa rahe hon to

khiDkiyan mat band karo

baat ye hai ki tumhaara jama kiya hua asasa tumhaare jism ke ek mamuli roen tak ko nahin chamka sakta

tumhaare jama kiye hue ghalat andheron par jab suraj chamakta hai

to tum us se uktate ho

tum mujhe bolne se rokte ho

main kahta hun tumhaare ye makan tumhaari aane wali qabron se muKHtalif nahin

tum bainal-aqwami bichchhuon se ziyaada chaalak nahin

tum duniya ki baDi kitabon se ziyaada gambhir nahin ho

jab tak main tum se apne safar ka sara saman chhin nahin lunga tum se iKHtilaf karunga

tumhein marne se rokunga