urdu zaban

urdu hamāre desh kī shīrīñ zabān hai

tahzīb kī hai vaz.a sharāfat kī jaan hai

ta.alīm-o-tarbiyat meñ aham is kā hai maqām

sher-o-suḳhan kī ruuh adab kī ye jaan hai

chhoḌā hai jab se is ko talaffuz bigaḌ gayā

ye har zabāñ kā juzv-e-bayāñ aur shaan hai

paidā huī ye hind meñ parvān bhī chaḌhī

phir kis liye kaho ye videshī zabān hai

maqbūl-e-ām bhī hai ye har-dil-azīz bhī

sach baat to ye hai ki ye sab kī zabān hai

ham is ke zauq se hue afsos munharif

āzādī kī tahrīk kī urdu hī jaan hai

āzād hind meñ na milā is ko kuchh maqām

ye māder-e-vatan ke shahīdoñ kī jaan hai

hālāñki rozgār kā zarīya nahīñ rahī

urdu paḌho paḌhāo ye apnī zabān hai

urdu hamare desh ki shirin zaban hai

tahzib ki hai waza sharafat ki jaan hai

talim-o-tarbiyat mein aham is ka hai maqam

sher-o-suKHan ki ruh adab ki ye jaan hai

chhoDa hai jab se is ko talaffuz bigaD gaya

ye har zaban ka juzw-e-bayan aur shan hai

paida hui ye hind mein parwan bhi chaDhi

phir kis liye kaho ye wideshi zaban hai

maqbul-e-am bhi hai ye har-dil-aziz bhi

sach baat to ye hai ki ye sab ki zaban hai

hum is ke zauq se hue afsos munharif

aazadi ki tahrik ki urdu hi jaan hai

aazad hind mein na mila is ko kuchh maqam

ye mader-e-watan ke shahidon ki jaan hai

haalanki rozgar ka zariya nahin rahi

urdu paDho paDhao ye apni zaban hai