lauh-e-ayyam

aqā.ed kirm-ḳhurda

ḳhatt-e-nā-mālūm meñ likkhī kitāboñ meñ

kahīñ mahfūz haiñ

ma.alūm kī buniyād nā-mālūm par

ik maz.haka

ye silsila mansūḳh kab hogā

maiñ jo kuchh māntā huuñ jāntā hogā

mujhe ye jānñā hogā

ki maiñ ik din

darūn-e-qabr, zer-e-ḳhāk

ḳhāk-e-sard o nā-hamvār meñ so jā.ūñgā

aur mere chehre hoñToñ āñkhoñ meñ

chaleñgī chyūñTiyāñ raste banā deñgī

huā thā rūnumā jis se mujhe us meñ milā deñgī

mujhe ye jānñā hogā

ki ik din maiñ nahīñ hūñgā

magar ye roz o shab

ye shādī o ġham

dasht dariyā koh

aur ye zindagī kā shor-e-bā-taġh.īr sab baaqī rahegā

haañ mujhe ye jānñā hogā

ki garche maiñ nahīñ hūñgā

ye merā haq-o-nā-haq

sabt hotā jā rahā hai

aur sadā baaqī rahegā

aqaed kirm-KHurda

KHatt-e-na-malum mein likkhi kitabon mein

kahin mahfuz hain

malum ki buniyaad na-malum par

ek mazhaka

ye silsila mansuKH kab hoga

main jo kuchh manta hun jaanta hoga

mujhe ye jaanna hoga

ki main ek din

darun-e-qabr, zer-e-KHak

KHak-e-sard o na-hamwar mein so jaunga

aur mere chehre honTon aankhon mein

chalengi chyunTiyan raste bana dengi

hua tha runuma jis se mujhe us mein mila dengi

mujhe ye jaanna hoga

ki ek din main nahin hunga

magar ye roz o shab

ye shadi o gham

dasht dariya koh

aur ye zindagi ka shor-e-ba-taghir sab baqi rahega

han mujhe ye jaanna hoga

ki garche main nahin hunga

ye mera haq-o-na-haq

sabt hota ja raha hai

aur sada baqi rahega