lauh-o-qalam

ham parvarish-e-lauh-o-qalam karte raheñge

jo dil pe guzartī hai raqam karte raheñge

asbāb-e-ġham-e-ishq baham karte raheñge

vīrāni-e-daurāñ pe karam karte raheñge

haañ talḳhī-e-ayyām abhī aur baḌhegī

haañ ahl-e-sitam mashq-e-sitam karte raheñge

manzūr ye talḳhī ye sitam ham ko gavārā

dam hai to mudāvā-e-alam karte raheñge

mai-ḳhāna salāmat hai to ham surḳhī-mai se

taz.īn-e-dar-o-bām-e-haram karte raheñge

baaqī hai lahū dil meñ to har ashk se paidā

rañg-e-lab-o-ruḳhsār-e-sanam karte raheñge

ik tarz-e-taġhāful hai so vo un ko mubārak

ik arz-e-tamannā hai so ham karte raheñge

hum parwarish-e-lauh-o-qalam karte rahenge

jo dil pe guzarti hai raqam karte rahenge

asbab-e-gham-e-ishq baham karte rahenge

virani-e-dauran pe karam karte rahenge

han talKHi-e-ayyam abhi aur baDhegi

han ahl-e-sitam mashq-e-sitam karte rahenge

manzur ye talKHi ye sitam hum ko gawara

dam hai to mudawa-e-alam karte rahenge

mai-KHana salamat hai to hum surKHi-mai se

tazin-e-dar-o-baam-e-haram karte rahenge

baqi hai lahu dil mein to har ashk se paida

rang-e-lab-o-ruKHsar-e-sanam karte rahenge

ek tarz-e-taghaful hai so wo un ko mubarak

ek arz-e-tamanna hai so hum karte rahenge