lauT aao suno

daraḳhtoñ se pattoñ ke jhaḌne kā mausam bhī hai aur tumhārī 'kañval'

baaġh ke ik kināre pe bikhre hue

sūkhte TūTte zard pattoñ pe chalte hue

nazm ik muḳhtasar likh rahī hai tumhāre liye

us kī āñkhoñ se be-rañg bahte hue

ashk jo laal hone ko the

hijr kā zahr piite hue kāsnī ho ga.e

apnī zaḳhmī sī poroñ se chun kar unheñ

likh rahī hai koī nazm ik muḳhtasar

jis kā unvān hai

lauT aao suno

ki daraḳhtoñ se pattoñ ke jhaḌne kā mausam bhī ab jā rahā hai bahāroñ kī raah dekhte

aur tumhārī 'kañval' pattī pattī bikharte hue

rāste se yuuñ lag kar baḌī der se

rāsta dekhte ab bahut thak ga.ī

lauT aao suno

daraKHton se patton ke jhaDne ka mausam bhi hai aur tumhaari 'kanwal'

bagh ke ek kinare pe bikhre hue

sukhte TuTte zard patton pe chalte hue

nazm ek muKHtasar likh rahi hai tumhaare liye

us ki aankhon se be-rang bahte hue

ashk jo lal hone ko the

hijr ka zahr pite hue kasni ho gae

apni zaKHmi si poron se chun kar unhen

likh rahi hai koi nazm ek muKHtasar

jis ka unwan hai

lauT aao suno

ki daraKHton se patton ke jhaDne ka mausam bhi ab ja raha hai bahaaron ki rah dekhte

aur tumhaari 'kanwal' patti patti bikharte hue

raste se yun lag kar baDi der se

rasta dekhte ab bahut thak gai

lauT aao suno