laxman-rekha

tum kahoge din to maiñ bhī din kahūñgā

ho balā se raat aadhī

maiñ kahūñgā raat

tum sūraj chamaktā ho to us ko chāñd samjhoge

tumhārī aañkh meñ aañsū nazar ā.eñge jab

maiñ ta.aziyat ke reshmī rūmāl se pūchhūñgā un ko

muskurā.ūñ maiñ

to tum is ko gul-afshānī kahoge

aur dhoke se kahīñ maiñ

shab ko shab kah duuñ

kahīñ tum din ko din kah kar mujhe sūraj dikhā do

nazar aa.e agar mujh ko

tumhārī aañkh ke aañsū magarmachh ke se aañsū

mire hañsne ke pīchhe jhāñktī mahrūmiyāñ tum ko nazar aa jaa.eñ

to samjho ki ham

ik dūsre ke jism meñ poshīda shaitānoñ se

vāqif ho ga.e haiñ

rāvanoñ meñ sulh-jūī ke liye

behad zarūrī chiiz hai,

laxman kī rekhā

tum kahoge din to main bhi din kahunga

ho bala se raat aadhi

main kahunga raat

tum suraj chamakta ho to us ko chand samjhoge

tumhaari aankh mein aansu nazar aaenge jab

main taziyat ke reshmi rumal se puchhunga un ko

muskuraun main

to tum is ko gul-afshani kahoge

aur dhoke se kahin main

shab ko shab kah dun

kahin tum din ko din kah kar mujhe suraj dikha do

nazar aae agar mujh ko

tumhaari aankh ke aansu magarmachh ke se aansu

mere hansne ke pichhe jhankti mahrumiyan tum ko nazar aa jaen

to samjho ki hum

ek dusre ke jism mein poshida shaitanon se

waqif ho gae hain

rawanon mein sulh-jui ke liye

behad zaruri chiz hai,

laxman ki rekha