lekin

pahlī bārish jaisā terā chehra thā

dil patthar kī har har darz meñ

koī koñpal phuuT ga.ī thī

ik ik rekh kā haath pakaḌ ke

terī yaad kī bel badan par phail rahī thī

aur phuvār paḌī phir ik din

tan chunarī kī silvaT silvaT

zahr aur numū kī kaahī rangat rachī huī thī

naḳhl-e-dār pe baur aane kā mausam bhī thā

dillī kī galiyoñ meñ us din

'mīr' naam ke saudā.ī kā mātam bhī thā

ghar meñ bahār aa.ī to 'ġhālib'

zaat ke kisī bayābān meñ thā

dast-e-sabā ne dastak dī to

'faiz' abhī tak

ġham-e-jahāñ ke zindāñ meñ thā

pahli barish jaisa tera chehra tha

dil patthar ki har har darz mein

koi konpal phuT gai thi

ek ek rekh ka hath pakaD ke

teri yaad ki bel badan par phail rahi thi

aur phuwar paDi phir ek din

tan chunari ki silwaT silwaT

zahr aur numu ki kahi rangat rachi hui thi

naKHl-e-dar pe baur aane ka mausam bhi tha

dilli ki galiyon mein us din

'mir' nam ke saudai ka matam bhi tha

ghar mein bahaar aai to 'ghaalib'

zat ke kisi bayaban mein tha

dast-e-saba ne dastak di to

'faiz' abhi tak

gham-e-jahan ke zindan mein tha