log kahte hain

log kahte haiñ ki parbat se nikal kar chashme

kisī khoī manzil kī taraf bahte haiñ

aur sar-e-shām havā un ke liye chaltī hai

jin ke mahbūb bahut duur kahīñ rahte haiñ

koī paiġhām nahīñ jis kī tavaqqo.a ho mujhe

kis liye gosh-bar-āvāz huuñ ma.alūm nahīñ

jo kabhī dil meñ tamannā thī vo āġhosh meñ hai

ab kidhar mā.il-e-parvāz huuñ ma.alūm nahīñ

nahīñ ma.alūm ki us ġham kī haqīqat kyā hai

ashk ban kar mirī āñkhoñ se bahā jaatā hai

lab pe aatā nahīñ vo jazb-e-betāb magar

giit banñe ke liye dil meñ rahā jaatā hai

log kahte hain ki parbat se nikal kar chashme

kisi khoi manzil ki taraf bahte hain

aur sar-e-sham hawa un ke liye chalti hai

jin ke mahbub bahut dur kahin rahte hain

koi paigham nahin jis ki tawaqqoa ho mujhe

kis liye gosh-bar-awaz hun malum nahin

jo kabhi dil mein tamanna thi wo aaghosh mein hai

ab kidhar mail-e-parwaz hun malum nahin

nahin malum ki us gham ki haqiqat kya hai

ashk ban kar meri aankhon se baha jata hai

lab pe aata nahin wo jazb-e-betab magar

git banne ke liye dil mein raha jata hai