lori

ai mire nūr-e-nazar laḳht-e-jigar jān-e-sukūñ

niiñd aanā tujhe dushvār nahīñ hai so jā

aaise bad-baḳht zamāne meñ hazāroñ hoñge

jin ko lorī bhī mayassar nahīñ aatī hogī

merī lorī se tirī bhuuk nahīñ miT saktī

maiñ ne maanā ki tujhe bhuuk satātī hogī

lekin ai merī umīdoñ ke hasīñ tāj-mahal

maiñ tirī bhuuk ko lorī hī sunā saktī huuñ

terā rah rah ke ye ronā nahīñ dekhā jaatā

ab tujhe duudh nahīñ ḳhuun pilā saktī huuñ

bhuuk to terā muqaddar hai ġharībī kī qasam

bhuuk kī aag meñ jal jal ke ye ronā kaisā

tū to aadī hai isī tarah se so jaane kā

bhuuk kī god meñ phir aaj na sonā kaisā

aaj kī raat faqat tū hī nahīñ terī tarah

aur kitne haiñ jinheñ bhuuk lagī hai beTe

roTiyāñ band haiñ sarmā.e ke tah-ḳhānoñ meñ

bhuuk is mulk ke khetoñ meñ ugī hai beTe

log kahte haiñ ki is mulk ke ġhaddāroñ ne

sirf mahñgā.ī baḌhāne ko chhupāyā hai anaaj

aaise nādār bhī is mulk meñ so jaate haiñ

hal chalā.e haiñ jinhoñ ne nahīñ paayā hai anaaj

tū hī is mulk meñ nādār nahīñ hai so jā

ai mire nūr-e-nazar laḳht-e-jigar jān-e-sukūñ

niiñd aanā tujhe dushvār nahīñ hai so jā

ai mere nur-e-nazar laKHt-e-jigar jaan-e-sukun

nind aana tujhe dushwar nahin hai so ja

aaise bad-baKHt zamane mein hazaron honge

jin ko lori bhi mayassar nahin aati hogi

meri lori se teri bhuk nahin miT sakti

main ne mana ki tujhe bhuk satati hogi

lekin ai meri umidon ke hasin taj-mahal

main teri bhuk ko lori hi suna sakti hun

tera rah rah ke ye rona nahin dekha jata

ab tujhe dudh nahin KHun pila sakti hun

bhuk to tera muqaddar hai gharibi ki qasam

bhuk ki aag mein jal jal ke ye rona kaisa

tu to aadi hai isi tarah se so jaane ka

bhuk ki god mein phir aaj na sona kaisa

aaj ki raat faqat tu hi nahin teri tarah

aur kitne hain jinhen bhuk lagi hai beTe

roTiyan band hain sarmae ke tah-KHanon mein

bhuk is mulk ke kheton mein ugi hai beTe

log kahte hain ki is mulk ke ghaddaron ne

sirf mahngai baDhane ko chhupaya hai anaj

aaise nadar bhi is mulk mein so jate hain

hal chalae hain jinhon ne nahin paya hai anaj

tu hi is mulk mein nadar nahin hai so ja

ai mere nur-e-nazar laKHt-e-jigar jaan-e-sukun

nind aana tujhe dushwar nahin hai so ja