lucknow

firdaus-e-husn-o-ishq hai dāmān-e-lucknow

āñkhoñ meñ bas rahe haiñ ġhazālān-e-lucknow

sabr-āzmā hai ġhamza-e-turkān-e-lucknow

rashk-e-zanān-e-misr kanīzān-e-lucknow

har samt ik hujūm-e-nigārān-e-lucknow

aur maiñ ki ek shoḳh-ġhazal-ḳhvān-e-lucknow

mutrib bhī hai sharāb bhī abr-e-bahār bhī

shīrāz ban gayā hai shabistān-e-lucknow

tole hue hai teġh-o-sināñ husn-e-be-naqāb

nāvak-fagan hai jalva-e-pinhān-e-lucknow

ik nau-bahār-e-nāz ko taake hai phir nigāh

vo nau-bahār-e-nāz ki hai jān-e-lucknow

dast-e-junūñ ko rokiye ye ḳhabt chhoḌiye

rusvā hai yūñhī chāk-e-garebān-e-lucknow

kuchh roz kā musāfir-o-mehmāñ huuñ aur kyā

kyuuñ bad-gumāñ hoñ yūsuf-e-kan.ān-e-lucknow

ab us ke ba.ad sub.h hai aur sub.h-e-nau 'majāz'

ham par hai ḳhatm shām-e-ġharībān-e-lucknow

firdaus-e-husn-o-ishq hai daman-e-lucknow

aankhon mein bas rahe hain ghazalan-e-lucknow

sabr-azma hai ghamza-e-turkan-e-lucknow

rashk-e-zanan-e-misr kanizan-e-lucknow

har samt ek hujum-e-nigaran-e-lucknow

aur main ki ek shoKH-ghazal-KHwan-e-lucknow

mutrib bhi hai sharab bhi abr-e-bahaar bhi

shiraaz ban gaya hai shabistan-e-lucknow

tole hue hai tegh-o-sinan husn-e-be-naqab

nawak-fagan hai jalwa-e-pinhan-e-lucknow

ek nau-bahaar-e-naz ko take hai phir nigah

wo nau-bahaar-e-naz ki hai jaan-e-lucknow

dast-e-junun ko rokiye ye KHabt chhoDiye

ruswa hai yunhi chaak-e-gareban-e-lucknow

kuchh roz ka musafir-o-mehman hun aur kya

kyun bad-guman hon yusuf-e-kanan-e-lucknow

ab us ke baad subh hai aur subh-e-nau 'majaz'

hum par hai KHatm sham-e-ghariban-e-lucknow