madam

aap be-vaj.h pareshān sī kyuuñ haiñ mādām

log kahte haiñ to phir Thiik hī kahte hoñge

mere ahbāb ne tahzīb na sīkhī hogī

mere māhaul meñ insān na rahte hoñge

nūr-e-sarmāya se hai rū-e-tamaddun kī jilā

ham jahāñ haiñ vahāñ tahzīb nahīñ pal saktī

muflisī hiss-e-latāfat ko miTā detī hai

bhuuk ādāb ke sāñchoñ meñ nahīñ Dhal saktī

log kahte haiñ to logoñ pe ta.ajjub kaisā

sach to kahte haiñ ki nādāroñ kī izzat kaisī

log kahte haiñ magar aap abhī tak chup haiñ

aap bhī kahiye ġharīboñ meñ sharāfat kaisī

nek mādām bahut jald vo daur aa.egā

jab hameñ ziist ke advār parakhne hoñge

apnī zillat kī qasam aap kī azmat kī qasam

ham ko tāzīm ke me.aar parakhne hoñge

ham ne har daur meñ tazlīl sahī hai lekin

ham ne har daur ke chehre ko ziyā baḳhshī hai

ham ne har daur meñ mehnat ke sitam jhele haiñ

ham ne har daur ke hāthoñ ko hinā baḳhshī hai

lekin in talḳh mabāhis se bhalā kyā hāsil

log kahte haiñ to phir Thiik hī kahte hoñge

mere ahbāb ne tahzīb na sīkhī hogī

maiñ jahāñ huuñ vahāñ insān na rahte hoñge

vaj.h-e-be-rañgī-e-gulzār kahūñ yā na kahūñ

kaun hai kitnā gunahgār kahūñ yā na kahūñ

aap be-wajh pareshan si kyun hain madam

log kahte hain to phir Thik hi kahte honge

mere ahbab ne tahzib na sikhi hogi

mere mahaul mein insan na rahte honge

nur-e-sarmaya se hai ru-e-tamaddun ki jila

hum jahan hain wahan tahzib nahin pal sakti

muflisi hiss-e-latafat ko miTa deti hai

bhuk aadab ke sanchon mein nahin Dhal sakti

log kahte hain to logon pe tajjub kaisa

sach to kahte hain ki nadaron ki izzat kaisi

log kahte hain magar aap abhi tak chup hain

aap bhi kahiye gharibon mein sharafat kaisi

nek madam bahut jald wo daur aaega

jab hamein zist ke adwar parakhne honge

apni zillat ki qasam aap ki azmat ki qasam

hum ko tazim ke mear parakhne honge

hum ne har daur mein tazlil sahi hai lekin

hum ne har daur ke chehre ko ziya baKHshi hai

hum ne har daur mein mehnat ke sitam jhele hain

hum ne har daur ke hathon ko hina baKHshi hai

lekin in talKH mabahis se bhala kya hasil

log kahte hain to phir Thik hi kahte honge

mere ahbab ne tahzib na sikhi hogi

main jahan hun wahan insan na rahte honge

wajh-e-be-rangi-e-gulzar kahun ya na kahun

kaun hai kitna gunahgar kahun ya na kahun