madar-e-fitrat

apnī āġhosh meñ le mādar-e-fitrat mujh ko

hai tire sāya-e-dāmāñ kī zarūrat mujh ko

mere jazbāt haiñ majrūh mirā dil hai figār

ġham-e-daurāñ kī tapish phūñk rahī hai dil-e-zār

merī maañ aaj to siine se lagā le mujh ko

apne āñchal meñ zarā der chhupā le mujh ko

zindagī kyā mujhe de be-sar-o-sāmāñ ḳhud hai

chārāgar kyā ho mirī lā.eq-e-darmāñ ḳhud hai

us ne jo kuchh bhī diyā us kā baḌā ehsāñ hai

dil magar tū ne jo baḳhshā hai baḌā nādāñ hai

dil ko kyoñ shīshe kī mānind banāyā tū ne

kyoñ na phir sang-e-havādis se bachāyā tū ne

zauq-e-parvāz to baḳhshā na par-o-bāl diye

sher ke sāñche meñ kyoñ qalb-o-nazar Dhaal diye

soz-e-ġham kuchh to kare kam ye havā se kah de

aaj to khul ke baras jaa.e havā se kah de

giit gā kar mujhe bahlā.eñ ye murġhān-e-chaman

phuul hañs hañs ke kareñ duur ye kāñToñ kī chubhan

kah nasīm-e-saharī se mirī hamrāz bane

mirī monis mirī hamdam mirī dam-sāz bane

kah de shabnam se mirī ruuh ko sairāb kare

ravish-e-gul se ye kah dil mirā shādāb kare

haram-o-dair kā haa.il na ye parda dekhūñ

tere ā.īne meñ ma.abūd kā jalva dekhūñ

apni aaghosh mein le madar-e-fitrat mujh ko

hai tere saya-e-daman ki zarurat mujh ko

mere jazbaat hain majruh mera dil hai figar

gham-e-dauran ki tapish phunk rahi hai dil-e-zar

meri man aaj to sine se laga le mujh ko

apne aanchal mein zara der chhupa le mujh ko

zindagi kya mujhe de be-sar-o-saman KHud hai

chaaragar kya ho meri laeq-e-darman KHud hai

us ne jo kuchh bhi diya us ka baDa ehsan hai

dil magar tu ne jo baKHsha hai baDa nadan hai

dil ko kyon shishe ki manind banaya tu ne

kyon na phir sang-e-hawadis se bachaya tu ne

zauq-e-parwaz to baKHsha na par-o-baal diye

sher ke sanche mein kyon qalb-o-nazar Dhaal diye

soz-e-gham kuchh to kare kam ye hawa se kah de

aaj to khul ke baras jae hawa se kah de

git ga kar mujhe bahlaen ye murghan-e-chaman

phul hans hans ke karen dur ye kanTon ki chubhan

kah nasim-e-sahari se meri hamraaz bane

meri monis meri hamdam meri dam-saz bane

kah de shabnam se meri ruh ko sairab kare

rawish-e-gul se ye kah dil mera shadab kare

haram-o-dair ka hail na ye parda dekhun

tere aaine mein mabud ka jalwa dekhun