madari zaban

āġhosh-e-vālida meñ paalā thā ham ko jis ne

ik paikar-e-adab meñ Dhālā thā ham ko jis ne

jis ne hai ibtidā se har zindagī sañvārī

vo mādarī zabāñ hai urdu zabāñ hamārī

bachpan meñ jis ne mīThī lorī sunā.ī ham ko

jis ke tufail jhūle meñ niiñd aa.ī ham ko

ras gholtī hai jis kī āvāz pyārī pyārī

vo mādarī zabāñ hai urdu zabāñ hamārī

jis kī madad se ham ne apnī zabān kholī

jis meñ samā ga.ī hai saare jahāñ kī bolī

jis kī har ik sifat hai sau ḳhūbiyoñ pe bhārī

vo mādarī zabāñ hai urdu zabāñ hamārī

jis se miTā jahālat kī raat kā añdherā

hindostāñ meñ chamkā tahzīb kā saverā

hai jis kī raushnī kā har ghar meñ faiz jaarī

vo mādarī zabāñ hai urdu zabāñ hamārī

vo 'krishn' hoñ ki 'bedī' 'chakbast' hoñ ki 'tālib'

'mahrūm' hoñ ki 'hālī' 'iqbāl' hoñ ki 'ġhālib'

sadiyoñ har ahl-e-maz.hab jis kā rahā pujārī

vo mādarī zabāñ hai urdu zabāñ hamārī

jis ne ḳhulūs-e-dil se ai 'kaif' sab ko paalā

jis kā har ek ghar meñ ab bhī hai bol-bālā

dushman ke bhī diloñ par hai jis kā ḳhauf taarī

vo mādarī zabāñ hai urdu zabāñ hamārī

aaghosh-e-walida mein pala tha hum ko jis ne

ek paikar-e-adab mein Dhaala tha hum ko jis ne

jis ne hai ibtida se har zindagi sanwari

wo madari zaban hai urdu zaban hamari

bachpan mein jis ne miThi lori sunai hum ko

jis ke tufail jhule mein nind aai hum ko

ras gholti hai jis ki aawaz pyari pyari

wo madari zaban hai urdu zaban hamari

jis ki madad se hum ne apni zaban kholi

jis mein sama gai hai sare jahan ki boli

jis ki har ek sifat hai sau KHubiyon pe bhaari

wo madari zaban hai urdu zaban hamari

jis se miTa jahaalat ki raat ka andhera

hindostan mein chamka tahzib ka sawera

hai jis ki raushni ka har ghar mein faiz jari

wo madari zaban hai urdu zaban hamari

wo 'krishn' hon ki 'bedi' 'chakbast' hon ki 'talib'

'mahrum' hon ki 'haali' 'iqbaal' hon ki 'ghaalib'

sadiyon har ahl-e-mazhab jis ka raha pujari

wo madari zaban hai urdu zaban hamari

jis ne KHulus-e-dil se ai 'kaif' sab ko pala

jis ka har ek ghar mein ab bhi hai bol-baala

dushman ke bhi dilon par hai jis ka KHauf tari

wo madari zaban hai urdu zaban hamari