mah-e-munir

ḳhalāoñ ke andhe musāfir se pūchheñ

vo ik zarra-e-ḳhāk se TuuT kar duur lā-intihā vus.atoñ aur

be-samt rāhoñ kī pur-haul ḳhāmoshiyoñ meñ

bhaTaktā phirā thā

havāoñ ke rahvār par barq-raftār sadiyāñ guzartī rahīñ

us kī rāhoñ meñ pal bhar ko aahaT na aa.ī

zamīñ ātishīñ goyā chaugāñ ḳhalā meñ luḌhaktī huī

yuuñ hī be-mudda.ā raqs kartī huī

batn-e-ḳhurshīd se aag ke surḳh dhabbe kī sūrat nikal kar

ḳhalā ke añdhere samundar meñ Duubī

phir āhista āhista tārīk hone lagī thī ki andhā musāfir

uchhal kar kisī samt-e-be-nām ko chal dayā thā

phir ab tak alag un ke mehvar alag un kī rāheñ

zamīñ bhī añdherī

musāfir bhī be-nūr

lekin use kyā patā thā ki ik din zamīñ

saarī gahrā.iyāñ paaT kar aa milegī

to aflāk ke andhe rah-rau se pūchheñ

ki ye lamha-e-vasl kah

tujh ko kaisā lagā hai

KHalaon ke andhe musafir se puchhen

wo ek zarra-e-KHak se TuT kar dur la-intiha wusaton aur

be-samt rahon ki pur-haul KHamoshiyon mein

bhaTakta phira tha

hawaon ke rahwar par barq-raftar sadiyan guzarti rahin

us ki rahon mein pal bhar ko aahaT na aai

zamin aatishin goya chaugan KHala mein luDhakti hui

yun hi be-muddaa raqs karti hui

batn-e-KHurshid se aag ke surKH dhabbe ki surat nikal kar

KHala ke andhere samundar mein Dubi

phir aahista aahista tarik hone lagi thi ki andha musafir

uchhal kar kisi samt-e-be-nam ko chal daya tha

phir ab tak alag un ke mehwar alag un ki rahen

zamin bhi andheri

musafir bhi be-nur

lekin use kya pata tha ki ek din zamin

sari gahraiyan paT kar aa milegi

to aflak ke andhe rah-rau se puchhen

ki ye lamha-e-wasl kah

tujh ko kaisa laga hai