mahaul

tabī.at jabriya taskīn se ghabrā.ī jaatī hai

hañsūñ kaise hañsī kam-baḳht tū murjhā.ī jaatī hai

bahut chamkā rahā huuñ ḳhāl-o-ḳhat ko sa.ī-e-rañgīñ se

magar pazhmurdagī sī ḳhāl-o-ḳhat par chhā.ī jaatī hai

umīdoñ kī tajallī ḳhuub barsī shīsha-e-dil par

magar jo gard thī tah meñ vo ab tak paa.ī jaatī hai

javānī chheḌtī hai laakh ḳhvābīda tamannā ko

tamannā hai ki us ko niiñd hī sī aa.ī jaatī hai

mohabbat kī nigūñ-sārī se dil Duubā sā rahtā hai

mohabbat dil kī izmehlāl se sharmā.ī jaatī hai

fazā kā sog utrā aa rahā hai zarf-e-hastī meñ

nigāh-e-shauq rūh-e-ārzū kajlā.ī jaatī hai

ye rañg-e-mai nahīñ saaqī jhalak hai ḳhūñ-shuda dil kī

jo ik dhundlī sī surḳhī añkhḌiyoñ meñ paa.ī jaatī hai

mire mutrib na de lillāh mujh ko dāvat-e-naġhma

kahīñ sāz-e-ġhulāmī par ġhazal bhī gaa.ī jaatī hai

tabiat jabriya taskin se ghabrai jati hai

hansun kaise hansi kam-baKHt tu murjhai jati hai

bahut chamka raha hun KHal-o-KHat ko sai-e-rangin se

magar pazhmurdagi si KHal-o-KHat par chhai jati hai

umidon ki tajalli KHub barsi shisha-e-dil par

magar jo gard thi tah mein wo ab tak pai jati hai

jawani chheDti hai lakh KHwabida tamanna ko

tamanna hai ki us ko nind hi si aai jati hai

mohabbat ki nigun-sari se dil Duba sa rahta hai

mohabbat dil ki izmehlal se sharmai jati hai

faza ka sog utra aa raha hai zarf-e-hasti mein

nigah-e-shauq ruh-e-arzu kajlai jati hai

ye rang-e-mai nahin saqi jhalak hai KHun-shuda dil ki

jo ek dhundli si surKHi ankhDiyon mein pai jati hai

mere mutrib na de lillah mujh ko dawat-e-naghma

kahin saz-e-ghulami par ghazal bhi gai jati hai