malan

ik jā rahī hai mālan phūloñ kā haar le kar

gulshan kā husn le kar dil kā qarār le kar

josh-e-numū kā aalam ruḳhsār mehr-e-tābāñ

māthe pe surḳh Tiikā mānind-e-sub.h-e-ḳhandāñ

kānoñ ke zard bunde raqsāñ the is adā se

parbat kī jaise titlī mauj-e-havā se khele

pairoñ meñ Daale chhāgal hāthoñ meñ pahne joshan

bikhrī thiiñ aisī zulfeñ bal khaa.e jaise nāgan

āñkhoñ meñ husn-e-mastī ik kaif-e-ḳhud-numā.ī

qadmoñ meñ shān-e-laġhzish goyā koī sharābī

mauj-e-nashāt-e-rangīñ nāzuk adā meñ pinhāñ

nuz.hat hayā kī larzāñ kāfir shabāb-e-nāzāñ

sarshār thā zamāna mad.hosh thī ḳhudā.ī

kaisā lihāz-e-taqvā kyā zikr-e-pārsā.ī

maddham suroñ meñ fitrat kuchh gungunā rahī thī

nāz-o-adā kī devī bansī bajā rahī thī

hasrat bharī nazar se maiñ us ko tak rahā thā

saarī fazā pe qabza husn-o-jamāl kā thā

ek ja rahi hai malan phulon ka haar le kar

gulshan ka husn le kar dil ka qarar le kar

josh-e-numu ka aalam ruKHsar mehr-e-taban

mathe pe surKH Tika manind-e-subh-e-KHandan

kanon ke zard bunde raqsan the is ada se

parbat ki jaise titli mauj-e-hawa se khele

pairon mein Dale chhagal hathon mein pahne joshan

bikhri thin aisi zulfen bal khae jaise nagan

aankhon mein husn-e-masti ek kaif-e-KHud-numai

qadmon mein shan-e-laghzish goya koi sharabi

mauj-e-nashat-e-rangin nazuk ada mein pinhan

nuzhat haya ki larzan kafir shabab-e-nazan

sarshaar tha zamana madhosh thi KHudai

kaisa lihaz-e-taqwa kya zikr-e-parsai

maddham suron mein fitrat kuchh gunguna rahi thi

naz-o-ada ki dewi bansi baja rahi thi

hasrat bhari nazar se main us ko tak raha tha

sari faza pe qabza husn-o-jamal ka tha