man

do lahreñ saath rahtī huī

jab kabhī milne ko hotī haiñ

to lagtā hai maañ ke hoñTh kuchh kahnā chāhte haiñ

nadī kabhī sotī nahīñ hai

muḌtī ThiThaktī

bhaTaktī aur Takrātī

a-virām

bahtī rahtī hai nadī

sadiyoñ tak

bahut huā to ūñghtī haiñ

us kī lahreñ

udāsī meñ kabhī-kabhī

paanī kī partoñ ke biich gūñjtā hai sannāTā

kuchh TūTtā hai kahīñ mañjhdār meñ

apnī ismirtī ke āñchal meñ dukhoñ ko chhupā.e

bahut nīche atul meñ sisaktī

phir bhī bahtī rahī chaTTānoñ se Takrātī

nadī kī tarah maañ bhī

jāgtī rahtī hai hamārī āñkhoñ meñ

sapnoñ ke liye sapnā ho jaane tak

do lahren sath rahti hui

jab kabhi milne ko hoti hain

to lagta hai man ke honTh kuchh kahna chahte hain

nadi kabhi soti nahin hai

muDti ThiThakti

bhaTakti aur Takraati

a-wiram

bahti rahti hai nadi

sadiyon tak

bahut hua to unghti hain

us ki lahren

udasi mein kabhi-kabhi

pani ki parton ke bich gunjta hai sannaTa

kuchh TuTta hai kahin manjhdar mein

apni ismirti ke aanchal mein dukhon ko chhupae

bahut niche atul mein sisakti

phir bhi bahti rahi chaTTanon se Takraati

nadi ki tarah man bhi

jagti rahti hai hamari aankhon mein

sapnon ke liye sapna ho jaane tak