man

jis ke chehre pe nazar aa.e ḳhudā kā partav

jis kī āñkhoñ meñ chamaktī ho faqat pyaar kī lau

jis kī palkoñ pe nazar aa.e vafā kī shabnam

jis ke hone se na hotā ho kisī tarah kā ġham

jis ko taḳhlīq ke jauhar pe ho qudrat hāsil

jis kī dhaḌkan ho har ik lahza lahū meñ shāmil

jis kī āġhosh meñ ehsās tahaffuz kā rahe

jis kī muskān se murjhā huā dil khil uTThe

jis ke lahje se Tapaktī ho mohabbat kī miThās

jis ke alfāz se bañdh jaatī ho TuuTī huī aas

jis kī āvāz se har sub.h sahīfa khul jaa.e

jis kī lorī se har ik ḳhvāb-darīchā khul jaa.e

jis ke idrāk se paidā ho dimāġhoñ meñ shu.ūr

jis kī ta.alīm se āñkhoñ meñ utar aatā ho nuur

aise paikar ko mohabbat kā jahāñ kahte haiñ

saada ik lafz meñ ham sab use maañ kahte haiñ

jis ke chehre pe nazar aae KHuda ka partaw

jis ki aankhon mein chamakti ho faqat pyar ki lau

jis ki palkon pe nazar aae wafa ki shabnam

jis ke hone se na hota ho kisi tarah ka gham

jis ko taKHliq ke jauhar pe ho qudrat hasil

jis ki dhaDkan ho har ek lahza lahu mein shamil

jis ki aaghosh mein ehsas tahaffuz ka rahe

jis ki muskan se murjha hua dil khil uTThe

jis ke lahje se Tapakti ho mohabbat ki miThas

jis ke alfaz se bandh jati ho TuTi hui aas

jis ki aawaz se har subh sahifa khul jae

jis ki lori se har ek KHwab-daricha khul jae

jis ke idrak se paida ho dimaghon mein shuur

jis ki talim se aankhon mein utar aata ho nur

aise paikar ko mohabbat ka jahan kahte hain

sada ek lafz mein hum sab use man kahte hain