man ka hona

ghuTnoñ kī piiḌā meñ jaag ke sone vaalī maañ

insulin kī golī se ḳhush hone vaalī maañ

silvaTī hāthoñ se kapḌoñ ko dhone vaalī maañ

paapā kī ik DaañT se ghuT kar rone vaalī maañ

bachchoñ se chhup chhup kar ronā kaisā hotā hai

maañ ho tum aur maañ kā honā aisā hotā hai

paapā kī intelligency tum par bhārī hai

lekin tum ne prem kī gañgā ghar meñ utārī hai

bāñdhnā ghar ko ek dhāge meñ kitnā bhārī hai

is meñ tumhārī sarf tumhārī hī hoshiyārī hai

tum ko hai ma.alūm pironā kaisā hotā hai

maañ ho tum aur maañ kā honā aisā hotā hai

dakiyānūsī kah kar biTiyā tum par hañstī hai

tum ko nahīñ ma.alūm kī phabtī tum par kastī hai

sīdhī aurat kī bhī upādhī tum ko Dastī hai

aur tumhārī us ghar meñ hī duniyā bastī hai

chhat dīvāreñ konā konā kaisā hotā hai

maañ ho tum aur maañ kā honā aisā hotā hai

chhoTī sī tanḳhvāh meñ kaise karne haiñ sab kaam

kabhī nahīñ miltā hai tum ko mehnat kā in.aam

aur nahīñ hotā hai jag meñ kabhī tumhārā naam

dhartī-māñ ke jaise tum bhī kartī nahīñ ārām

tum ko kyā ma.alūm ki sonā kaisā hotā hai

maañ ho tum aur maañ kā honā aisā hotā hai

ghuTnon ki piDa mein jag ke sone wali man

insulin ki goli se KHush hone wali man

silwaTi hathon se kapDon ko dhone wali man

papa ki ek DanT se ghuT kar rone wali man

bachchon se chhup chhup kar rona kaisa hota hai

man ho tum aur man ka hona aisa hota hai

papa ki intelligency tum par bhaari hai

lekin tum ne prem ki ganga ghar mein utari hai

bandhna ghar ko ek dhage mein kitna bhaari hai

is mein tumhaari sarf tumhaari hi hoshiyari hai

tum ko hai malum pirona kaisa hota hai

man ho tum aur man ka hona aisa hota hai

dakiyanusi kah kar biTiya tum par hansti hai

tum ko nahin malum ki phabti tum par kasti hai

sidhi aurat ki bhi upadhi tum ko Dasti hai

aur tumhaari us ghar mein hi duniya basti hai

chhat diwaren kona kona kaisa hota hai

man ho tum aur man ka hona aisa hota hai

chhoTi si tanKHwah mein kaise karne hain sab kaam

kabhi nahin milta hai tum ko mehnat ka inam

aur nahin hota hai jag mein kabhi tumhaara nam

dharti-man ke jaise tum bhi karti nahin aaram

tum ko kya malum ki sona kaisa hota hai

man ho tum aur man ka hona aisa hota hai